آسٹریلیا نے پاکستان کو دھو ڈالا، ٹسٹ سیریز پر 0-2 سے قابض

آسٹریلیائی کرکٹ ٹیم نے ایڈیلیڈ اوول میدان پر کھیلے گئے دوسرے ٹسٹ میچ کے چوتھے دن پیر کو پاکستان کو اننگ اور 48 رنوں سے ہرا دیا۔ اس کے ساتھ ہی میزبان ٹیم نے دو میچوں کی ٹسٹ سیریز میں 0-2 سے کلین سوئپ حاصل کر لی۔ آسٹریلیا نے اس سیریز میں لگاتار دوسری بار پاکستان کو اننگ سے شکست دی ہے۔ میزبان ٹیم نے پہلے میچ میں بھی پاکستان کو اننگ اور پانچ رن سے ہرایا تھا۔ دونوں ٹیموں کے درمیان کھیلا گیا یہ میچ ڈے نائٹ ٹسٹ میچ تھا اور ڈے نائٹ ٹسٹ میچوں میں آسٹریلیا کی یہ لگاتار چھٹی فتح ہے۔

آسٹریلیا کی اپنے گھر میں پاکستان کے خلاف یہ لگاتار پانچویں سیریز فتح ہے اور ہر بار کنگاروؤں نے پاکستان کو کلین سوئپ کیا ہے۔ وہیں، پاکستان کی آسٹریلیا میں یہ لگاتار 14ویں ٹسٹ شکست ہے۔ اس میدان پر پاکستان کی یہ دوسری شکست ہے۔ آسٹریلیا کی ٹیم اس سال گھر میں ایک بھی میچ نہیں ہاری ہے۔

آسٹریلیا نے دوسرے میچ کی اپنی پہلی اننگ تین وکٹ پر 589 رن بنا کر ڈکلیئر قرار دیا تھا۔ اس کے جواب میں پاکستان کی ٹیم یاسر شاہ کی سنچری کے باوجود اپنی پہلی اننگ میں 302 رن پر آل آؤٹ ہو گئی اور اسے میزبان ٹیم کے خلاف فالو آن کھیلنے کے لیے مجبور ہونا پڑا تھا۔ فالو آن کھیلنے کے باوجود پاکستان کی ٹیم پیر کو میچ کے چوتھے دن 239 رن پر آل آؤٹ ہو گئی اور اسے اننگ اور 48 رن سے شکست کا سامنا کرنا پڑا۔

پاکستان کے لیے دوسری اننگ میں شان مسعود نے 68، اسعد شفیق نے 57 اور محمد رضوان نے 45 رنوں کا تعاون کیا۔ آسٹریلیا کی جانب سے ناتھن لیون نے پانچ اور جوش ہیزل ووڈ نے تین وکٹ لیے جب کہ مشیل اسٹارک کو ایک وکٹ ملا۔ میچ میں ریکارڈ ناٹ آؤٹ 335 رنوں کی اننگ کھیلنے والے آسٹریلیا کے سلامی بلے باز ڈیوڈ وارنر کو مین آف دی میچ اور مین آف دی سیریز کا انعام ملا۔ وارنر نے دو میچوں کی سیریز میں 489 رن بنائے۔

اپنی اس کارکردگی کے دم پر آسٹریلیا کی ٹیم اب آئی سی سی ٹسٹ چمپئن شپ کے پوائنٹ ٹیبل میں دوسرے نمبر پر پہنچ گئی ہے۔ ہندوستان اب بھی سرفہرست ہے۔ آئی سی سی ٹسٹ چمپئن شپ شروع ہونے کے بعد ہندوستان کے بعد آسٹریلیا ہی ایک ایسی ٹیم ہے جس نے اب تک تین ٹسٹ سیریز میں کامیابی حاصل کی ہے۔