ٹی۔20 عالمی کپ میں ایک اور مقابلہ بارش کی نذر، انگلینڈ اور آسٹریلیا کا میچ بغیر کوئی گیند پھینکے منسوخ

میلبورن: ٹی-20 عالمی کپ میں بارش مسلسل خلل ڈال رہی ہے اور جمعہ کے روز آسٹریلیا اور انگلینڈ کے درمان کھیلے جانے والے دوسرے میچ کو بھی بغیر کوئی گیند پھینکے منسوخ کر دینا پڑا۔ اس سے قبل افغانستان اور آئرلینڈ کے درمیان کھیلے جانے والا میچ بھی بارش کی نذر ہو گیا تھا۔

آسٹریلیا اور انگلینڈ کے درمیان گروپ اول کا مقابلہ بارش کے سبب میدان کے نم اور غیر محفوظ ہونے کے سبب منسوخ کر دیا گیا اور اس کے دونوں پوائنٹس دونوں ٹیموں میں تقسیم کر دئے گئے۔ دونوں کو ایک ایک پوائنٹ حاصل ہوا ہے۔ انگلینڈ اور آسٹریلیا کے تین تین میچوں میں 3-3 پوائنٹس ہیں اور وہ پوائنٹس ٹیبل میں نیٹ رن ریٹ کے حساب سے بالترتیب دوسرے اور چوتھے مقام پر ہیں۔

اس عالمی کپ میں آسٹریلیا کا سفر شکست سے شروع ہوا تھا جب اسے پہلے میچ میں نیوزی لینڈ کے ہاتھوں 89 رن سے شکست کا سامنا کرنا پڑا تھا، اگرچہ میزبان ٹیم نے بعد میں سری لنکا کو 7 وکٹوں سے شکست دے کر پوائنٹس ٹیبل میں اپنی پوزیشن بہتر کی۔ دوسری جانب انگلینڈ نے اپنی مہم کا آغاز افغانستان کے خلاف پانچ وکٹوں کی زبردست جیت کے ساتھ کیا لیکن بعد میں اسے کمزور سمجھے جانے والے آئرلینڈ کے ہاتھوں پانچ رن سے شکست کا سامنا کرنا پڑا تھا۔

آسٹریلیا کو اپنے بقیہ دو میچ آئرلینڈ اور افغانستان کے خلاف کھیلنے ہیں۔ جبکہ انگلینڈ کا مقابلہ گروپ میں سرفہرست نیوزی لینڈ اور سری لنکا کے ساتھ ہونے ہے۔ اس سے قبل صبح افغانستان اور آئرلینڈ کے درمیان میچ بارش کے باعث منسوخ قرار دے دیا گیا، میچ کا ٹاس بھی نہیں پھینکا جا سکا تھا۔ دونوں ٹیموں کو ایک ایک پوائنٹ حاصل ہو گیا ہے۔

آئرلینڈ اب گروپ اول کی پوائنٹس ٹیبل میں تیسری پوزیشن پر چلا گیا ہے۔ دوسری جانب افغانستان کے دو میچ بارش کی وجہ سے ضائع ہو گئے اور وہ اپنے گروپ میں آخری مقام پر ہے۔ اب آئرلینڈ اور افغانستان دونوں کے ’سپر 12‘ مرحلے میں دو دو میچ باقی ہیں۔