ٹی-20 عالمی کپ: افغانستان کی نیوزی لینڈ پر جیت کی خواہش، ہندوستان کی امیدیں بھی وابستہ

موجودہ ٹی۔20 ورلڈ کپ 2021 میں اب تک کی کارکردگی سے سب کو چونکاتے ہوئے افغانستان اتوار کو یہاں نیوزی لینڈ کے خلاف کسی بھی قیمت پر جیتنا چاہے گا

تصویر ٹوئٹر
تصویر ٹوئٹر
user

یو این آئی

ابوظہبی: موجودہ ٹی۔20 ورلڈ کپ 2021 میں اب تک کی کارکردگی سے سب کو چونکاتے ہوئے افغانستان اتوار کو یہاں نیوزی لینڈ کے خلاف کسی بھی قیمت پر جیتنا چاہے گا۔ اس جیت سے ان کی سیمی فائنل تک رسائی کی امیدیں زندہ رہیں گی۔ یہی صورتحال نیوزی لینڈ کے لیے بھی ہوگی کیونکہ اس میچ میں ہارنے سے نیوزی لینڈ کے لیے سیمی فائنل کے دروازے بند ہو جائیں گے۔ ابوظہبی کے شیخ زاید اسٹیڈیم میں سہ پہر 3.30 بجے کھیلے جانے والے گروپ ٹو کے اس میچ میں دو ٹیمیں میدان میں اتریں گی۔

تاہم افغانستان کی ٹیم کو اسٹیڈیم میں موجود ہندوستانی شائقین کی بھرپور حمایت حاصل ہوگی۔ درحقیقت اب ہندوستانی ٹیم کی سیمی فائنل میں پہنچنے کی امیدیں نیوزی لینڈ کے خلاف افغانستان کی جیت پر منحصر ہیں، اس لیے یہ میچ ہندوستان کے ساتھ ساتھ افغانستان اور نیوزی لینڈ کے لیے بھی بہت اہم ہوگا۔ اگر افغانستان یہ میچ جیت جاتا ہے تو سب کچھ نیٹ رن ریٹ پر آجائے گا۔ اس کے بعد ہندوستانی ٹیم اپنا آخری میچ بھی اسی کے مطابق نامیبیا کے خلاف کھیلے گی۔


نیوزی لینڈ اور افغانستان کی بات کی جائے تو دونوں ٹیموں نے اب تک اچھی کرکٹ کھیلی ہے۔ افغانستان نے چار میں سے دو میچ جیتے ہیں، نیوزی لینڈ نے چار میں سے تین میچ جیتے ہیں اور تین میں لگاتار فتح حاصل کی ہے۔ نیوزی لینڈ کے تجربہ کار اوپنر مارٹن گپٹل، کپتان کین ولیمسن، ڈیرل مچل اور گلین فلپس اچھی فارم میں نظر آ رہے ہیں۔

دوسری جانب افغانستان ہمیشہ کی طرح اچھی بولنگ کر رہا ہے لیکن اس بار ان کی بیٹنگ نے بھی زور دکھایا ہے۔ اوپنرز حضرت اللہ ززئی، محمد شہزاد، رحمان اللہ گرباز اور خود کپتان محمد نبی اچھی بیٹنگ کر رہے ہیں۔

لوئر آرڈر بلے باز کریم جنت نے بھی ہندوستان کے خلاف گزشتہ میچ میں 22 گیندوں پر 42 رنز کی ناٹ آؤٹ اننگز کھیلی تھی۔ تاہم افغانستان کی باؤلنگ قدرے کمزور دکھائی دے رہی تھی کہ مجیب الرحمان چوٹ کی وجہ سے آخری دو میچوں سے باہر ہو گئے۔ مجیب نیوزی لینڈ کے خلاف اہم میچ میں واپسی کریں گے یا نہیں، یہ غیر یقینی ہے، حالانکہ ٹیم کو کرشماتی اسپنر راشد خان اور کپتان محمد نبی کی خدمات حاصل ہوں گی۔ اس میں کوئی شک نہیں کہ نیوزی لینڈ کے بلے بازوں کے لیے ان دونوں گیند بازوں کی اسپن کو کھیلنا مشکل ہوگا۔


یہ دونوں کے درمیان پہلا ٹی۔ٹوئنٹی انٹرنیشنل میچ ہوگا۔ ریکارڈ کی بات کریں تو نیوزی لینڈ نے ابوظہبی کے میدان میں صرف ایک ٹی ٹوئنٹی میچ ہارا ہے، افغانستان نے یہاں کھیلے گئے 12 میں سے نو میچ جیتے ہیں اور تین میں اسے شکست ہوئی ہے۔ افغانستان کو ابوظہبی میں کھیلنے کا کافی تجربہ ہے۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔