2027 ورلڈ کپ: ہندوستان-پاکستان میچ کے لیے 84 لاکھ ٹکٹوں کی درخواست، اسٹیڈیم میں صرف 34 ہزار افراد کی گنجائش

2027 ون ڈے ورلڈ کپ کو لے کر دونوں ملکوں کے شائقین میں زبردست دلچسپی ہے۔ اس مقابلے کے لیے اس قدر دیوانگی ہے کہ ٹکٹوں کے لیے لاکھوں افراد قطار میں ہیں۔ جنوبی افریقہ کے جوہانسبرگ میں واقع دی وانڈرز اسٹیڈیم میں 10 اکتوبر 2027 کو ہونے والے اس مقابلے کے لیے اب تک تقریباً 84 لاکھ ٹکٹوں کی درخواستیں موصول ہو چکی ہیں۔ خاص بات یہ ہے کہ اس اسٹیڈیم میں شائقین کے بیٹھنے کی گنجائش محض 34 ہزار ہے۔ یعنی دستیاب نشستوں کے مقابلے میں ٹکٹوں کی مانگ کئی گنا زیادہ ہے۔ انٹرنیشنل کرکٹ کونسل (آئی سی سی) کے مطابق ہندوستان-پاکستان مقابلے کے لیے مجموعی طور پر 8397294 ٹکٹوں کی درخواستیں موصول ہوئی ہیں۔ یہ ٹورنامنٹ کا اب تک کا سب سے زیادہ مطالبے والا مقابلہ بن گیا ہے۔ یہاں تک کہ ورلڈ کپ کا فائنل بھی ٹکٹوں کی مانگ کے معاملے میں اس سے پیچھے ہے۔

2027 ون ڈے ورلڈ کپ کا فائنل بھی جوہانسبرگ کے اسی وانڈرز اسٹیڈیم میں21 نومبر کو کھیلا جائے گا۔ اس مقابلے کے لیے اب تک 7900944 ٹکٹوں کی درخواستیں موصول ہوئی ہیں۔ اس طرح فائنل ٹورنامنٹ کا دوسرا سب سے زیادہ مانگ والا مقابلہ ہے۔ آئی سی سی کے مطابق 2027 ورلڈ کپ کے لیے دنیا بھر کے 193 ممالک سے 28 لاکھ شائقین نے ٹکٹ حاصل کرنے میں دلچسپی ظاہر کی ہے۔ اب تک مجموعی طور پر 12 کروڑ سے زیادہ ٹکٹوں کی درخواستیں موصول ہو چکی ہیں۔ وہیں 3.2 کروڑ سے زیادہ میچ رجسٹریشن مکمل کیے جا چکے ہیں۔ اس سے ظاہر ہوتا ہے کہ شائقین کی دلچسپی صرف ہندوستان-پاکستان جیسے بڑے مقابلوں تک محدود نہیں ہے۔ ٹکٹوں کی درخواستوں کے معاملے میں جنوبی افریقہ، برطانیہ، ہندوستان، امریکہ اور آسٹریلیا سرفہرست ہیں۔ صرف افریقی براعظم سے 1.49 کروڑ سے زیادہ ٹکٹوں کی درخواستیں موصول ہوئی ہیں۔

جنوبی افریقہ کے 8 اسٹیڈیموں میں ہونے والے 41 مقابلوں کے لیے 10.5 کروڑ سے زیادہ ٹکٹوں کی درخواستیں موصول ہوئی ہیں۔ ان میں میزبان جنوبی افریقہ کے 11 مقابلوں کے لیے تقریباً 2.6 کروڑ درخواستیں شامل ہیں۔ ان 11 میچوں میں پہلے سے طے شدہ سپر-7 مرحلے کے مقابلے بھی شامل ہیں۔ زمبابوے میں بھی شائقین کا جوش قابل دید ہے۔ وہاں ٹکٹوں کی مجموعی درخواستوں کی تعداد 1.3 کروڑ سے تجاوز کر گئی ہے۔ 24 اکتوبر کو وکٹوریہ فالز کے نئے موسی-او-تونیا انٹرنیشنل کرکٹ اسٹیڈیم میں زمبابوے اور ہندوستان کے درمیان ہونے والے میچ کے لیے ہی 33 لاکھ سے زیادہ درخواستیں موصول ہوئی ہیں۔ وہیں نامیبیا کے ونڈہوک میں واقع نامیبیا کرکٹ گراؤنڈ میں ہونے والے 6 مقابلوں کے لیے 20 لاکھ سے زیادہ ٹکٹوں کی درخواستیں موصول ہوئی ہیں۔ ان میں 8 اکتوبر کو انگلینڈ اور بنگلہ دیش کے درمیان ہونے والے میچ کے لیے تقریباً 9 لاکھ درخواستیں شامل ہیں۔

2027 ون ڈے ورلڈ کپ 24 برسوں بعد افریقی سرزمین پر واپس لوٹے گا۔ جنوبی افریقہ، زمبابوے اور نامیبیا مشترکہ طور پر اس ٹورنامنٹ کی میزبانی کریں گے۔ اس میں 14 ٹیمیں 12 اسٹیڈیموں میں مجموعی طور پر 57 مقابلے کھیلیں گی۔ ٹکٹ بیلٹ کے لیے درخواست دینے کی آخری تاریخ 21 نومبر 2026 کو رات 11:59 بجے (جنوبی افریقی وقت) ہے۔ شائقین آئی سی سی کی سرکاری ٹکٹ ویب سائٹ پر اپنی پسند کے مقابلوں کے لیے رجسٹریشن کرا سکتے ہیں۔ جن میچوں کے لیے مانگ دستیاب ٹکٹوں سے زیادہ ہوگی، ان کے ٹکٹوں کی تقسیم رینڈم بیلٹ عمل کے ذریعے کی جائے گی۔ مقررہ وقت تک رجسٹریشن نہ کرانے والے شائقین اس بیلٹ کے ذریعے ٹکٹ حاصل کرنے کے اہل نہیں ہوں گے۔