قہقہہ لگانا سیاسی ہے، آزادی ہے... میناکشی نٹراجن

کئی جملے اور الفاظ طویل عرصہ تک نئے نئے معنی دیتے رہتے ہیں، جیسے کسی پتّے سے قطرے ٹپکتے رہتے ہیں۔ ایسا ہی ایک جملہ میری زندگی میں آیا اور آج تک ہر روز میرے ذہن پر دستک دیتا رہتا ہے۔ ’پرسنل اِز پولیٹیکل‘ کے اس جملۂ بیج سے ہر لمحہ کوئی نہ کوئی نئی کونپل پھوٹتی رہتی ہے۔ عورت کو یہ سکھایا گیا ہے کہ اس کی اپنی کوئی ذاتی حیثیت نہیں ہوتی۔ اس کا مذہب یہ ہے کہ وہ اپنے آپ کو سب کے لیے قربان کر دے۔ اس کی زندگی مختلف کرداروں میں تقسیم ہے... ماں، بیٹی، بہو، بیوی، بہن، بھابھی۔ اگر وہ کوئی پیشہ بھی اختیار کرے تو بھی اس سے یہی توقع کی جاتی ہے کہ وہ اپنی سماجی اور خاندانی ذمہ داریاں بھی پوری خوبی کے ساتھ نبھائے، جبکہ مرد کے لیے ایسی کوئی شرط نہیں ہوتی۔

پھر جب اسے گھر کے اندر کسی ظلم و ستم کا سامنا کرنا پڑتا ہے تو کہا جاتا ہے کہ ذاتی معاملات میں کسی کو مداخلت کی اجازت نہیں۔ اس طرح وہ 2 انتہاؤں کے درمیان جھولتی رہتی ہے۔ یا تو اس کا اپنا کچھ نہیں، یا پھر یہ اس کا ذاتی معاملہ ہے، لہٰذا وہ خاموشی سے ذلت برداشت کرتی رہے۔ حالانکہ حقیقت یہ ہے کہ دونوں صورتیں گہرے طور پر سیاسی ہیں۔ یہ کیفیت غلبے کو تہذیب و روایت کا لباس پہنا کر جبر کو معمول بنا دیتی ہے۔ لیکن بات اتنی سادہ نہیں ہے۔ ذاتی ہونے کے کئی معنی ہیں۔ ذاتی ہونے کا مطلب کیا ہے؟ کیا اس کا کوئی الگ وجود بھی ہے یا نہیں؟ وہ اجتماعی وجود میں کس حد تک گھلی ہوئی ہے اور کس حد تک الگ ہے؟ باہر اور اندر کب ایک ہو جاتے ہیں اور کب جدا رہتے ہیں؟ کس تناظر میں وہ الگ ہوں گے اور کب ایک دکھائی دیں گے؟ سیاست کی طالبہ ہونے کے ناطے یہ سوال بار بار میرے سامنے آ کھڑے ہوتے ہیں۔

کسی بھی مکالمے کے دوران اچانک یہی ’ذاتی‘ احساس بیدار ہو جاتا ہے۔ بات خواہ پورے نظام کی ہو رہی ہو، لیکن کسی کے انا کو ٹھیس پہنچ جاتی ہے۔ اگر سماجی امتیاز کی بات ہو رہی ہو تو اچانک بہت سے ساتھی بول اٹھتے ہیں کہ ہمارے یہاں ایسا نہیں ہوتا، ہم ایسا نہیں کرتے، ہمارے گھر میں کبھی ایسا نہیں ہوا۔ ہر طرح کے امتیاز کو نہ ماننے کا دعویٰ کرنے والے واقعی یہی سمجھتے ہیں کہ وہ امتیاز نہیں مانتے اور نہ ماننا چاہتے ہیں۔ لیکن جیسے ہی امتیاز کا سوال اٹھتا ہے، معلوم نہیں ان کے اندر شناخت کی کون سی تہہ کھل جاتی ہے۔ وہ رد عمل ظاہر کرتی ہے۔ انہیں امتیاز پر گفتگو اپنے اوپر حملے کی طرح محسوس ہونے لگتی ہے۔ ایسے میں آخر ذاتی کیا ہوتا ہے؟

وہ کیا چیز ہے جو چبھتی ہے؟ کیوں چبھتی ہے؟ کیا ذاتی وجود ایک ناقابل تقسیم اکائی ہے، یا اس کی بھی کئی سطحیں ہیں؟ ایک ہی انسان کے اندر کتنی طرح کی ذاتی شناختیں موجود ہیں؟ وہ سب جو اس کی شخصیت کو تشکیل دیتی ہیں۔ ہر بار ذاتی وجود کی کوئی نئی سطح بول اٹھتی ہے، رد عمل ظاہر کرتی ہے۔ ذاتی وجود کی ہر تہہ سے پیدا ہونے والا رد عمل یا رائے سیاسی ہوتی ہے۔ سماج سے الگ ہو کر خود کو سمجھنا سراسر غیر سیاسی رویہ ہے۔ ایسی غیر سیاسی سوچ جو اپنی سہولت یا اپنی امتیازی حیثیت سے ہمیں بے خبر رکھتی ہے۔ محض اپنی صلاحیت کے بل پر مقام حاصل کر لینے کی خوش فہمی اسی غیر سیاسی رویے کا نتیجہ ہے۔ یہ ایک ایسی انا کی تسکین کرتی ہے جس میں برادری، سماجی نظام اور اجتماعی ڈھانچہ سب ثانوی محسوس ہونے لگتے ہیں۔ یہ سہولت پسند نظر خود اپنی جگہ ایک سیاست ہے، برتری کی سیاست۔

یہ سمجھ بھی پیدا ہوتی ہے کہ کوئی آزاد ’ذاتی وجود‘ نہیں ہوتا۔ سماجی نظام کی ساخت ہی ذاتی احساسات کے بیج بوتی رہتی ہے۔ شاذ و نادر ہی کوئی خالص ذاتی روشنی سب کچھ بدل دیتی ہے، لیکن اس میں بھی حقیقتاً کتنا حصہ ’ذاتی‘ ہوتا ہے، یہ کہنا مشکل ہے۔ کیا ہم سب کے اندر پوری کائنات، اپنی تمام باریکیوں اور تضادات کے ساتھ، ایک فکری نظام کی صورت میں موجود نہیں؟ ’میرا‘ کیا ہے؟ ’میں‘ کون ہوں؟ صرف فلسفیانہ سوال کے طور پر نہیں۔ سائنس کہتی ہے کہ میرے جسم کے آدھے سالمے تو بیرونی ہیں، کسی نہ کسی خرد جاندار کے ہیں۔ کئی بار جو چیز میں کھانا چاہتی ہوں، وہ دراصل انہی کی خواہش ہوتی ہے، نہ کہ والدین سے ملے سالموں کی۔ تو ان دونوں طرح کے سالموں میں سے میں کس کو ترجیح دوں؟ ان میں سے میں کون ہوں؟ کیا صرف آدھے سالموں کا حصہ یا مکمل وجود؟ مکمل وجود کے بغیر تو میں سانس بھی نہیں لے سکتی۔ پھر باہر اور اندر کی تقسیم کہاں باقی رہتی ہے؟ کوئی واضح حد قائم نہیں کی جا سکتی۔ سرحد تو ہے، لیکن اس کے آر پار مسلسل لین دین جاری ہے۔ پھر دوسروں پر انحصار کے بغیر میرا اپنا وجود کہاں ہے؟ باہمی تعلق ہی سے تو ’میں‘ وجود میں آتی ہوں۔ یہ سوچ مجھے بہت آزادی دیتی ہے۔ یعنی صرف میری تنہا نجات ممکن نہیں۔ کسی دور جنگل میں جا کر روح کی آزادی حاصل نہیں ہو سکتی۔ سب کو روٹی ملے گی تو مجھے بھی ملے گی۔ صرف مجھے ملتی رہے، اس سے یہ ضروری نہیں کہ سب کو بھی ملے۔ ممکن ہے کہ کل مجھے نہ ملے تو میرے لیے کھڑا ہونے والا بھی کوئی نہ ہو۔ تب میری بھی روٹی بند ہو سکتی ہے۔ سب میں ’میں‘ ہوں اور مجھ میں ’سب‘ ہیں... اس سوچ نے حقیقت کو میرے سامنے آشکار کیا۔ یہی حقوق کی سیاست کی بنیاد ہے۔ ستیاگرہ بھی اسی فہم کی سیاست کا عملی تجربہ ہے۔ یہاں ’ذاتی‘ سیاسی ہے، لیکن بالکل ذاتی کچھ بھی نہیں۔

ذاتی احساس کی ہر کیفیت سے کوئی نہ کوئی سیاست جنم لیتی ہے۔ وہ ذریعہ اور منزل کو ایک دوسرے سے جدا نہیں مانتی۔ میں نے اپنے ہر انتخاب میں یہ طے کیا کہ میرا ذریعہ کیا ہوگا۔ اخلاقی زینے کی کس سیڑھی تک اترنا میرے لیے قابل قبول ہوگا۔ یہ ذاتی فیصلہ سیاست سے الگ نہیں ہو سکتا۔ کئی بار یہ مان لیا جاتا ہے کہ ذاتی اخلاق اور سماجی اخلاق الگ الگ ہوتے ہیں۔ ذاتی زندگی میں شفافیت ممکن ہے، لیکن اسے سماجی زندگی سے الگ رکھنا چاہیے۔ لیکن ذاتی صرف ذاتی نہیں ہوتا، وہ سیاسی بھی ہوتا ہے۔ وہ کئی طرح کے اتحاد قائم کرنے پر مجبور کرتا ہے۔ ان اتحادوں کے معنی بدلتے رہتے ہیں۔ وہ سیاسی فیصلوں کو متاثر کرتے ہیں۔ انہیں محض ذاتی تعلق کہہ کر مسترد نہیں کیا جا سکتا۔

ان تمام خیالات کے درمیان آخری کشمکش یہ بھی ہے کہ آخر ذاتی وجود پر حکومت کس کی ہوتی ہے؟ اس کا بڑا حصہ بیرونی آمریتوں کے زیر اثر ہو سکتا ہے۔ وہ کئی پنجروں میں قید ہو سکتا ہے۔ اگر یہ تمام بیرونی پابندیاں ختم بھی ہو جائیں تو کیا اس کے بعد ذاتی وجود آزاد ہو جاتا ہے؟ اپنے لمحاتی جذبات، انا، خوف، عدم تحفظ اور خواہشات کی غلامی بھی ذاتی وجود کو جکڑ سکتی ہے۔ جو شخص ان زنجیروں میں بندھا ہو، وہ ’سیاسی سوراج‘ کے لیے کیسے لڑ پائے گا؟ ان سے آزادی کو ایک شخص نے اپنی سیاست بنایا تھا۔ وہ سیاست کو اسی آزادی کا ذریعہ سمجھتا تھا۔ ابھی خود اس مقام تک پہنچنا میرے لیے آسان محسوس نہیں ہوتا، لیکن اس سچ کے متلاشی پر میرا یقین ہے۔ اس لیے میں سیاست کو اپنے اندر کی تمام ذاتی سطحوں، عدم تحفظ اور خوف کو کھنگالنے کا ذریعہ ضرور سمجھتی ہوں۔ میں مایوس ہوئے بغیر ہر روز اپنی ہر نئی سامنے آنے والی کمزوری پر قہقہہ لگاتی ہوں۔ قہقہہ لگانا میں نے کچھ ہی دن پہلے سیکھا ہے، ورنہ سخت مزاجی میں ہی مر جاتی۔ یہ معرفت حاصل ہوئی کہ ہنسنے کے کوئی پیسے نہیں لگتے۔ لیکن اچھی لڑکیاں ہنستی نہیں۔ دروپدی ہنسی تو مصیبت میں پھنس گئی۔ سماج نے جو سکھایا تھا، ذاتی وجود نے کب اسے قبول کر لیا معلوم ہی نہ ہوا، اور وہ میری شخصیت کا حصہ بن گیا۔ پھر میں نے شعوری طور پر اسے توڑا۔ یہ قہقہہ لگانا بھی سیاسی ہے۔ یہ ذاتی بھی ہے اور پوری دنیا سے جڑا ہوا بھی۔ یہی آزادی ہے۔

’پرسنل اِز پولیٹیکل‘ کہنے والی ارونا اب 80 برس کی ہو گئی ہیں۔ ان کی عمر ضرور بڑھ گئی ہوگی، لیکن یہ جملہ کبھی بوڑھا نہیں ہوگا۔ یہ ہر بار نئے معنی کو جنم دیتا رہے گا۔

ارونا! تم بوڑھی ہویا نہ ہو، لیکن یہ جملہ کبھی بوڑھا نہیں ہوگا۔