گگ ورکرز اور بدلتی ہوئی سیاسی فضا، مزدوروں کے حقوق کی جدوجہد… جگدیش رتنانی

حیدرآباد میں راہل گاندھی کی گگ ورکرز ریلی اور تلنگانہ کی نئی فلاحی اسکیم نے مزدوروں کے حقوق پر بحث تیز کر دی ہے۔ کیا کانگریس کارپوریٹ حامی سیاست سے ہٹ کر مزدوروں کے حق میں نئی سمت اختیار کر رہی ہے؟

<div class="paragraphs"><p>علامتی تصویر / اے آئی</p></div>
i

لبرلائزیشن اور نجکاری کا ایک بڑا منفی نتیجہ ہندوستان میں ٹریڈ یونینوں کا تقریباً خاتمہ رہا ہے۔ ناقدین کا کہنا ہے کہ بی جے پی کے دور حکومت میں مزدوروں کے حقوق کا دائرہ تیزی سے محدود ہوا ہے۔ اس کا آغاز گجرات میں اس وقت ہوا تھا جب نریندر مودی وہاں کے وزیر اعلیٰ تھے، اور بعد میں کاروبار نواز پالیسیوں کے زیر اثر یہ رجحان پورے ملک میں پھیل گیا۔ رواں سال اپریل میں نوئیڈا میں کم از کم اجرت میں اضافے کے مطالبے پر ہونے والی وسیع ہڑتال کے بعد اتر پردیش میں 350 سے زیادہ افراد کو گرفتار کیا گیا اور مزدور نمائندوں کو جیل بھیج دیا گیا۔ جب احتجاج، ہڑتالوں اور تحریکوں کو دبانے کے لیے سرکاری مشینری استعمال کی جاتی ہے تو مزدوروں کو منظم کرنا ایک انتہائی مشکل کام بن جاتا ہے۔ یہ صورت حال اس دور سے بالکل مختلف ہے جب کارخانوں کے دروازوں پر مزدوروں کے اجتماعات ہوا کرتے تھے، اجرت کے معاہدے طویل جدوجہد کے بعد طے پاتے تھے اور یونین کے نمائندے حقیقی طاقت رکھنے والے رہنما تصور کیے جاتے تھے۔

گگ معیشت کے نئے ہندوستان میں اب ایک نیا مزدور طبقہ سامنے آیا ہے۔ گزشتہ ہفتے کے اختتام پر یہ طبقہ اس وقت توجہ کا مرکز بنا جب لوک سبھا میں قائد حزب اختلاف راہل گاندھی اور تلنگانہ کے وزیر اعلیٰ ریونت ریڈی نے حیدرآباد میں ہزاروں گگ ورکرز کے ساتھ ایک بڑی ریلی کی اور ان کے لیے ریاست کی نئی فلاحی اسکیم کا آغاز کیا۔ ملک بھر میں گگ ورکرز کی تعداد تقریباً ایک کروڑ 20 لاکھ ہے، جن میں سے 4.2 لاکھ صرف تلنگانہ میں ہیں اور ان کی اکثریت حیدرآباد میں کام کرتی ہے۔ اس ریلی نے ایک ایسے بڑے اور تیزی سے بڑھتے ہوئے طبقے کو آواز دی ہے جس کی تعداد رواں دہائی کے اختتام تک 2.3 کروڑ سے تجاوز کرنے کا اندازہ ہے۔

تاہم، اس بڑھتی ہوئی افرادی قوت کو ایسے کام کے رشتوں میں جینا پڑ رہا ہے جو باضابطہ اور غیر رسمی شعبوں کے درمیان ایک غیر واضح حد پر قائم ہیں۔ انہیں نہ تو باضابطہ شعبے کے فوائد حاصل ہوتے ہیں اور نہ ہی غیر رسمی شعبے کی مشکلات سے چھٹکارا ملتا ہے۔ ایک طرف ایپ پر مبنی پلیٹ فارم اور ان کی تیز رفتار ترقی نئے ہندوستان کی تصویر پیش کرتے ہیں، جبکہ دوسری طرف ان پلیٹ فارموں کے بڑے ادارے مارکیٹ میں زیادہ سے زیادہ حصہ حاصل کرنے کی دوڑ میں سالانہ 12 ہزار کروڑ روپے سے زیادہ کے مجموعی خسارے کا سامنا کر رہے ہیں۔ ان کمپنیوں کے گگ پارٹنر درحقیقت غریب اور بے روزگار نوجوان ہیں، جو انتہائی کم معاوضے، تقریباً نہ ہونے کے برابر سہولتوں اور گھنٹوں و منٹوں کے حساب سے طے ہونے والی ٹھیکہ مزدوری کے غیر یقینی نظام میں کام کرنے پر مجبور ہیں۔ انہیں کسی قسم کا تحفظ حاصل نہیں ہے۔


تلنگانہ کی یہ نئی اسکیم، جس کا آغاز 14 نومبر کو مارچ میں منظور کیے گئے ریاستی قانون کے تحت کیا گیا، گگ ورکرز کو سماجی تحفظ فراہم کرنے کی کوشش ہے۔ اس کے تحت ہر گگ ورکر کو پانچ لاکھ روپے کا حادثاتی بیمہ اور دس لاکھ روپے کا ہیلتھ انشورنس فراہم کیا جائے گا۔ اس اسکیم کے اخراجات ہر لین دین پر عائد ایک فیصد سیس سے پورے کیے جائیں گے، جسے متعلقہ کمپنیوں کو ریاست کے گگ ورکرز ویلفیئر بورڈ میں جمع کرانا ہوگا۔

اسکیم میں کام سے متعلق اعداد و شمار، ریکارڈ اور ادائیگیوں میں شفافیت کے علاوہ حیدرآباد بھر میں وائی فائی کی سہولت سے آراستہ آرام گاہیں اور گاڑیوں کی پارکنگ کے مقامات فراہم کرنے کا وعدہ بھی کیا گیا ہے۔ راہل گاندھی نے اس موقع پر کہا کہ بی جے پی اور آر ایس ایس چاہتے ہیں کہ مزدور دن کے 24 گھنٹے کام کریں، اپنا خون پسینہ بہائیں، حادثات میں زخمی ہوں، اپنی جان گنوائیں، کچلے جائیں یا معذور ہو جائیں، لیکن ان کی محنت کا فائدہ صرف ارب پتیوں کی جیب میں جائے۔ انہوں نے کہا کہ کانگریس کا نظریہ یہ ہے کہ مزدور اس ملک کی ریڑھ کی ہڈی ہیں۔ اس اسکیم کا وعدہ 2023 کے اسمبلی انتخابات کی مہم کے دوران کیا گیا تھا۔

یہ تسلیم کیا جا سکتا ہے کہ اپنی مرضی سے یا سیاسی مجبوری کے تحت، گگ اور پلیٹ فارم ورکرز کے حق میں ایک نئی سیاسی فضا بن رہی ہے۔ یہ مزدور اگرچہ کام کرنے کے طریقوں میں بنیادی ڈھانچہ جاتی تبدیلی کی نمائندگی کرتے ہیں، لیکن وہ آج کی سیاست میں بھی اسی نوعیت کی تبدیلی لا سکتے ہیں۔

یہ مزدور نہ تو کارخانوں کے دروازوں پر اجتماعات کر سکتے ہیں، نہ کسی مینیجر کے دفتر میں داخل ہو سکتے ہیں اور نہ ہی روایتی مزدوروں کی طرح کام روک کر اپنے اوزار رکھ سکتے ہیں، کیونکہ ان کے اوزار اور دفاتر دراصل ان کی اپنی گاڑیاں، گھر اور ذاتی ملکیت ہیں۔ ان کی اپنے دفتر تک رسائی صرف ایک ایپ یا ہیلپ لائن کے ذریعے ہوتی ہے۔ یہی وجہ ہے کہ ان کے احتجاج کا طریقہ بھی منفرد ہے۔ وہ اجتماعی طور پر ایک ساتھ ایپ سے لاگ آؤٹ ہو جاتے ہیں، جیسا کہ گزشتہ سال نئے سال کی شام دیکھنے میں آیا تھا۔


حکومت بھی ان کے خلاف اسی انداز میں لاٹھی چارج یا پابندیاں عائد نہیں کر سکتی جس طرح روایتی طور پر کارخانوں کے مزدوروں کے احتجاج کو دبایا جاتا رہا ہے۔ گگ ورکرز کسی ایک چھت کے نیچے منظم نہیں ہوتے بلکہ مختلف مقامات پر بکھرے رہتے ہیں۔ اس کے باوجود پلیٹ فارم کمپنیاں ریٹنگ، مراعات اور ایپ سے غیر فعال کرنے جیسے طریقوں کے ذریعے ان پر اپنا کنٹرول قائم رکھتی ہیں۔ کسی ورکر کو ایپ سے ہٹا دینا جدید دور کی تالہ بندی کے مترادف ہے، بالکل اسی طرح جیسے اجتماعی طور پر ایپ سے لاگ آؤٹ ہونا روایتی کارخانے کی ہڑتال کی نئی شکل ہے۔

ایسا نہیں ہے کہ مرکز کی بی جے پی حکومت نے گگ ورکرز کو اپنے قریب لانے کی کوشش نہیں کی۔ نئی لیبر کوڈز میں گگ اور پلیٹ فارم ورکرز کو باضابطہ طور پر تسلیم کیا گیا ہے اور انہیں سماجی تحفظ کی اسکیموں، فلاحی فنڈز اور مختلف فوائد کی منتقلی کے نظام میں شامل کرنے کی گنجائش رکھی گئی ہے۔ تاہم، یہ اقدامات ابھی تک عملی طور پر مکمل طور پر نافذ نہیں ہو سکے ہیں۔

وسیع تر مزدور قوانین میں اصلاحات کے تحت 29 مرکزی قوانین کی جگہ چار لیبر کوڈز متعارف کرائے گئے۔ ان میں سے ایک سماجی تحفظ سے متعلق کوڈ ہے، جس میں گگ اور پلیٹ فارم ورکرز کے لیے مناسب سماجی تحفظ کے اقدامات تیار کرنے کی گنجائش موجود ہے۔ تاہم، مرکزی ٹریڈ یونینوں نے ان اصلاحات کی سخت مخالفت کی، جس سے نئے تنازعات پیدا ہوئے اور یہ اصلاحات عملی طور پر غیر مؤثر ہو کر رہ گئیں۔

مرکزی حکومت کا نقطہ نظر زیادہ تر گگ ورکرز کے مسائل کو نئے مواقع اور معاشی ترقی کے تناظر میں دیکھنے کا رہا ہے۔ اس کے لیے ’غیر معمولی مواقع‘، ’آمدنی میں اضافہ‘ اور ’معاشی تنوع‘ جیسی خوش نما اصطلاحات استعمال کی جاتی رہی ہیں۔ اقتصادی جائزہ 2025-26 میں کم اجرت، الگورتھم کے ذریعے کنٹرول اور پلیٹ فارم کمپنیوں کی من مانی پر سوال ضرور اٹھائے گئے تھے۔ نئے سال کی شام ہونے والی ہڑتال اور مرکزی وزیر محنت سے ملاقات کے بعد جنوری میں کوئک کامرس کمپنیوں نے دس منٹ میں ڈیلیوری کرنے کے غیر انسانی وعدے سے بھی دستبرداری اختیار کر لی تھی۔


تاہم، مزدوروں کے حقوق کے لیے زیادہ مضبوط آوازیں دوسرے حلقوں سے سامنے آئی ہیں۔ ان میں شہری سماج کی تنظیمیں اور کانگریس کی حکومت والی ریاستیں شامل ہیں، جنہوں نے اس معاملے میں سب سے پہلے قانون سازی کی۔ 2023 میں راجستھان، 2025 میں کرناٹک اور اب تلنگانہ نے گگ ورکرز کے تحفظ کے لیے اقدامات کیے ہیں۔

اس سلسلے میں غیر منافع بخش ادارے ’جن پہل‘ اور گگ ورکرز ایسوسی ایشن کی جانب سے ستمبر 2026 میں ملک بھر میں کیا گیا ایک سروے بھی اہم ہے۔ ’ہندوستان میں پلیٹ فارم پر مبنی گگ ورکرز کا پیشہ ورانہ تحفظ اور صحت‘ کے عنوان سے کیے گئے اس مطالعے میں بتایا گیا کہ گگ اور پلیٹ فارم ورکرز کو مسلسل طویل اوقات کار، پیشہ ورانہ خطرات، بنیادی سہولتوں تک محدود رسائی اور موسمیاتی تبدیلیوں سے پیدا ہونے والے خطرات کا سامنا ہے۔

مطالعے کے مطابق یہ حالات اتفاقی نہیں بلکہ پلیٹ فارم پر مبنی کام کے نظام میں بنیادی طور پر پیوست ہیں۔ اس میں کہا گیا ہے کہ کام کی جگہ کی واضح تعریف نہ ہونے سے کمپنیاں اپنی ذمہ داریوں سے بچ نکلتی ہیں۔ اس کے نتیجے میں صفائی، آرام، صحت کی سہولتوں اور سماجی تحفظ تک مزدوروں کی رسائی میں بڑے خلا موجود ہیں۔

گزشتہ ایک دہائی اور اس سے زیادہ عرصے کے دوران قومی سیاست کا جھکاؤ نمایاں طور پر دائیں بازو کی طرف ہوا ہے۔ اس رجحان کے نتیجے میں جمہوری دائرے محدود ہوئے اور عوامی ناراضگی میں اضافہ ہوا، جس کا سامنا آج مودی حکومت کو کرنا پڑ رہا ہے۔

مزدوروں کے تئیں کانگریس کا یہ فلاحی نقطہ نظر نہ صرف بی جے پی کی پالیسیوں سے مختلف ہے بلکہ یہ لبرلائزیشن کے دور کی پرانی کانگریس سے بھی ایک اسٹریٹجک فاصلہ ظاہر کرتا ہے۔ یہ تبدیلی واضح طور پر دکھائی دے رہی ہے، لیکن بنیادی سوال یہ ہے کہ کیا یہ محض علامتی تبدیلی ہے یا واقعی نظریاتی سطح پر ایک بڑی تبدیلی کا آغاز؟

ہندوستان کو صرف کارپوریٹ مفادات کے نقطہ نظر سے باہر نکال کر کاروبار اور مزدوروں کے درمیان ایک نیا توازن قائم کرنے کی سمت لے جانے کے لیے ابھی بہت زیادہ سیاسی قوت اور سرمایہ کاری کی ضرورت ہوگی۔

(مصنف جگدیش رتنانی صحافی اور ایس پی جین انسٹی ٹیوٹ آف مینجمنٹ اینڈ ریسرچ میں فیکلٹی ممبر ہیں۔ بشکریہ: دی بلین پریس)