موبائل فون کی سستی کال شرح کے ’اچھے دن‘ جانے والے ہیں، یکم دسمبر میں ملے گی بری خبر!

ٹیلی مواصلات بحران کا اثر اب عام صارفین پر بھی پڑنے والا ہے۔ ملک کی سب سے بڑی ٹیلی مواصلات کمپنیوں بھارتی ائیرٹیل اور ووڈافون نے یکم دسمبر سے اپنے ٹیرف میں اضافہ کرنے کا فیصلہ کیا ہے۔ کمپنیوں کے ایڈجسٹیڈ گراس ریونیو (اے جی آر) کے زیر التوا بے حد بھاری بھرکم بقائے کے بعد یہ فیصلہ سامنے آیا ہے۔ حالانکہ دونوں کمپنیوں نے ابھی یہ نہیں بتایا ہے کہ عام لوگوں کی جیب پر ان کے فیصلے کا کتنا اثر پڑنے جا رہا ہے۔

بھارتی ائیرٹیل نے ایک بیان میں کہا کہ ’’ٹیلی مواصلات سیکٹر میں تیزی سے بدلتی ٹیکنالوجی کے ساتھ زیادہ پونجی کے سرمایہ کی لگاتار ضرورت ہے۔ اس لیے یہ انتہائی اہم ہے کہ انڈسٹری ڈیجیٹل انڈیا کے نظریہ کی حمایت کرنے کے لیے ہمیشہ تیار رہے۔‘‘ بیان میں یہ بھی کہا گیا ہے کہ ’’ائیرٹیل کمپنی دسمبر سے قیمتوں میں مناسب اضافہ کرے گی۔‘‘

ووڈافون نے ٹیلی مواصلات سیکٹر میں مالی بحران کا تذکرہ کیا ہے اور کہا کہ اسے سبھی پروفٹ ہولڈروں نے قبول کیا ہے اور کابینہ سکریٹری کی صدارت میں سکریٹریوں کی ایک اعلیٰ سطحی کمیٹی مناسب راحت پہنچانے پر غور کر رہی ہے۔ ووڈافون-آئیڈیا لمیٹڈ نے کہا ہے کہ وہ ’مناسب طور سے‘ ٹیرف میں اضافہ کرے گی جو یکم دسمبر سے اثرانداز ہوگا۔