پٹرول اور ڈیزل کی قیمتیں 22ویں دن بھی مستحکم، عوام کو مزید راحت ملنے کا انتظار

نئی دہلی: ہندوستان اور امریکہ سمیت بڑی معیشتوں کے اپنے اسٹریٹجک ذخائر سے تیل جاری کرنے کے اعلان کا اثر آج بین الاقوامی بازار پر نظر آیا جہاں خام تیل میں دو فیصد سے زیادہ کی گراوٹ درج کی گئی لیکن مقامی سطح پر آج مسلسل 22 ویں دن گھریلو سطح پر پٹرول اور ڈیزل کی قیمتوں میں کوئی تبدیلی نہیں کی گئی ۔ سرکاری تیل مارکیٹنگ کمپنیوں نے آج پٹرول اور ڈیزل کی قیمتوں کو مستحکم رکھا۔

تیل پیدا کرنے والے ممالک کی جانب سے پیداوار نہ بڑھانے کے بعد ہندوستان اور امریکہ نے اپنے اسٹریٹجک ذخائرسےخام تیل کو نکالنے کا اعلان کیا ہے ۔ چین، جاپان اور جنوبی کوریا سے بھی اسٹریٹجک ذخائر سے تیل جاری کرنے کی اپیل کی ہے ۔ ہندوستان 50 لاکھ بیرل تیل جاری کرے گا۔ ہندوستان کے اسٹریٹجک تیل کے ذخائر 3.8 کروڑ بیرل ہیں اوریہ ملک کے مشرقی اور جنوبی ساحل پر واقع ہیں ۔ اس اعلان کے بعد تیل کی قیمتوں پر کچھ دباؤ نظر آیا کیونکہ بین الاقوامی منڈی میں ان کی قیمتیں تقریباً مستحکم ہیں۔

مرکزی حکومت کی طرف سے پٹرول اور ڈیزل پرایکسائز ڈیوٹی میں بالترتیب 5 روپے اور 10 روپے فی لیٹر کی کمی کرنے سے ملک میں اس کی قیمتوں میں کمی آئی تھی ۔ اس کے بعد اتر پردیش، کرناٹک سمیت ملک کی 22 ریاستوں اور مرکز کے زیر انتظام علاقوں نے ان دونوں مصنوعات پر ویلیو ایڈڈ ٹیکس ( وی اے ٹی) میں کمی ہے ۔ اس سے متعلقہ ریاستوں میں ان دونوں پٹرولیم مصنوعات کی قیمتوں میں مزید کمی آئی ہے۔

ہندوستان اور امریکہ سمیت بیشتر بڑی معیشتوں کی جانب سےسٹریٹجک تیل کے ذخائر سے تیل جاری کرنے کے اعلان کے اثرات اب مارکیٹ پرنظرآرہے ہیں ۔ آج سنگاپور میں بریٹ کروڈ 1.76 فیصد کم ہو کر 80.77 ڈالر فی بیرل پر اور یو ایس کروڈ 2.36 فیصد کم ہو کر 76.54 ڈالر فی بیرل پر تجارت کر رہا ہے۔

گھریلومارکیٹ میں 22 ویں دن بھی پٹرول اور ڈیزل کی قیمت میں کوئی تبدیلی نہیں ہوئی ۔ دارالحکومت دہلی میں ملک کی سب سے بڑی آئل مارکیٹنگ کمپنی انڈین آئل کارپوریشن لمیٹڈ کے پمپ پر پٹرول کی قیمت 103.97 روپے فی لیٹر اور ڈیزل کی قیمت 86.67 روپے فی لیٹر رہی۔

پٹرول اور ڈیزل کی قیمتوں کا روزانہ جائزہ لیا جاتا ہے اوراس کی بنیاد پر نئی قیمتیں ہر روز صبح 6 بجے سے لاگو ہوتی ہیں ۔ آج ملک کے چار بڑے شہروں میں پٹرول اور ڈیزل کی قیمتیں مندرجہ ذیل ہیں ۔

شہر —————— پٹرول —————— ڈیزل

دہلی ————— 103.97 ————— 86.67

ممبئی ————— 109.98 ————— 94.14

چنئی ————— 101.40 ————— 91.43

کولکاتا ————— 104.67————— 89.79