مدر ڈیری: گائے کے دودھ کے داموں میں دو روپے فی لیٹر کا اضافہ

نئی دہلی: مدر ڈیری نے جمعہ کے روز دہلی اور قومی راجدھانی خطہ (این سی آر) میں گائے کے دودھ کی قیمت میں 2 روپے فی لیٹر کا اضافہ کیا ہے۔ اب گائے کا دودھ 44 روپے فی لیٹر پر دستیاب ہوگا۔ اس سے پہلے گائے کے دودھ کی قیمت 42 روپے فی لیٹر تھی۔

ایک افسر کے مطابق گائے کے دودھ کی نئی قیمیتں 6 ستمبر سے نافذ العمل ہوں گی۔ نئی قیمتوں کے تحت 500 ملی لیٹر کا پیک 23 روپے اور ایک لیٹر کا پیک 44 رپے میں ملے گا۔ دودھ کی دیگر اقسام کی قیمتیں غیر تبدیل رہیں گی۔

دودھ کی فراہمی کرنے والی ملک کی اہم کمپنی کی طرف سے کہا گیا ہے کہ گائے کے دودھ کی ریٹیل قیمت میں اضافہ اس لئے کیا گیا ہے کیوں کہ کمپنی کچے دودھ کی خرید کے لئے کسانوں کو زیادہ قیمت ادا کر رہی ہے۔

مدر ڈیری کی قیمتوں میں اضافہ کے ساتھ ہی اس بات کا امکان ہے کہ دوسری دودھ فراہم کرنے والی کمپنی مثلاً امول اور پراگ بھی قیمتوں میں اضافہ کر سکتی ہیں۔ واضح رہے کہ مدر ڈیری دہلی-این سی آر میں تقریباً 30 لاکھ ٹن دودھ کی فراہمی کرتی ہے ، جن میں سے آٹھ لاکھ ٹن گائے کا دودھ ہوتا ہے۔

قبل ازیں، مئی کے مہینے میں مدر ڈیری نے دہلی این سی آر میں اپنے پالی پیک کی اقسام کے صارفین کے داموں میں اضافہ کیا تھا۔ حالانکہ ایک لیٹر گائے کے دودھ کے پیک کی قیمتوں میں کوئی تبدیلی نہیں کی گئی تھی۔ لیکن آدھا لیٹر کے پیک کی قیمت میں ایک روپے کا اضافہ کیا گیا تھا ۔