سونا اور چاندی کی قیمت میں آج پھر ہوئی گراوٹ، خریداروں کے لیے بہترین موقع

سونا اور چاندی کی قیمتوں میں گراوٹ کا سلسلہ ایک بار پھر شروع ہو گیا ہے۔ جمعرات کو پھسلنے کے بعد ہفتے کے آخری کاروباری دن جمعہ کو بھی ملٹی کموڈیٹی ایکسچینج یعنی ’ایم سی ایکس‘ پر سونے اور چاندی کی قیمتیں ٹوٹ گئی ہیں۔ چاندی کی قیمت میں تو اچانک بڑی گراوٹ آئی ہے اور اب یہ اپنی بلند ترین سطح سے مزید سستی ہو گئی ہے۔ دوسری جانب سونے کی فیوچر قیمت بھی مارکیٹ کھلتے ہی گر گئی ہے۔

ایم سی ایکس پر ایک کلو چاندی کی قیمت گزشتہ بند قیمت کے مقابلے میں ایک ہی جھٹکے میں 1,429 روپے فی کلوگرام کم ہو گئی۔ جمعرات کو فیوچر ٹریڈنگ ختم ہونے پر 4 ستمبر کی ایکسپائری والی ایک کلو چاندی کی قیمت 2,19,967 روپے پر بند ہوئی تھی اور جمعہ کو مارکیٹ کھلتے ہی یہ 2,18,538 روپے فی کلوگرام پر آ گئی۔

جمعہ کو چاندی کی قیمت میں ابتدائی گراوٹ کے بعد ایک کلو چاندی کی قیمت 29 جنوری کی اپنی بلند ترین سطح یعنی 4,20,048 روپے کے مقابلے میں اب 2,01,510 روپے تک سستی مل رہی ہے۔ وہیں یکم جولائی سے لے کر مہینے کے آخری دن تک چاندی کی قیمتوں میں گراوٹ پر نظر ڈالیں تو یہ قیمتی شئے 11,846 روپے فی کلوگرام تک پھسل چکی ہے۔ جولائی ماہ کی پہلی تاریخ کو چاندی کی قیمت 2,30,384 روپے تھی۔

دوسری طرف ایم سی ایکس میں سونے کی قیمت پر نظر ڈالیں تو جمعہ کو مارکیٹ کھلتے ہی اس قیمتی زرد شئے کی قیمت بھی چاندی کے ساتھ قدم سے قدم ملاتے ہوئے پھسل گئی۔ فیوچر ٹریڈنگ میں 5 اگست کی ایکسپائری والا 10 گرام 24 قیراط سونا جمعرات کو 1,43,232 روپے پر بند ہوا تھا اور مارکیٹ کھلتے ہی آج 1,42,253 روپے پر آ گیا۔ یعنی سونا 979 روپے فی 10 گرام سستا ہو گیا۔

سونے کی قیمت میں بھی فیوچر ٹریڈنگ کے دوران اپنی بلند ترین سطح سے تیزی سے گراوٹ دیکھی گئی ہے۔ چاندی کی طرح ایم سی ایکس گولڈ ریٹ بھی 29 جنوری کو پہلی بار 2 لاکھ روپے کی تاریخی سطح کو پار کر گیا تھا، لیکن اس کے بعد سونے کی قیمت بھی مسلسل گرتی چلی گئی۔ موجودہ قیمت کا موازنہ کریں تو سونا اپنی بلند ترین سطح سے تقریباً 60,000 روپے فی 10 گرام سستا مل رہا ہے۔