دیپیکا اور رنویر کے کونکنی طریقہ سے پھیرے، کل سندھی رسم و رواج سے ہوگی شادی

اٹلی کے لیک کومو کی ایک ولا میں دیپیکا پادوکون اور رنویر سنگھ نے آج کونکنی رسم و رواج کے مطابق شادی کر لی۔ اب 15 نوبر کو سندھی رسم رواج کے مطابق شادی ہوگی۔

تصویر سوشل میڈیا
تصویر سوشل میڈیا
user

قومی آوازبیورو

14 Nov 2018, 5:11 PM
اٹلی میں شاندار تقریب کے دوران ’خلجی‘ کی ہوئی ’پدماوتی‘

پردہ سیمیں پر علاء الدین خلجی اور پدماوتی کے کردار ادا کرنے والے رنویر سنگھ اور دیپیکا پادوکون آج رشتہ ازدواج میں منسلک ہو گئے۔ شادی کی تقریب اٹلی میں منعقد ہوئی اور اس میں مخصوص مہمانان شامل ہوئے۔

ترک نژاد علاء الدین خلجی سنہ 1296 میں دہلی کے سلطان بنے تھے اور ان کے 721 سال بعد ایک فلم ’پدماوتی‘ بنی جس میں بالی ووڈ اداکار رنویر سنگھ نے خلجی جبکہ دیپیکا پادوکون نے پدماوتی کا کردار ادا کیا ہے۔

فلم پدماوتی کے ٹریلر جیسے ہی منظر عام پر آئے تھے ٹھاکروں نے ہنگامہ کرنا شروع کر دیا تھا۔ کئی شہروں میں توڑ پھوڑ کی گئی یہاں تک کہ فلم کی شوٹنگ کے دوران بھی رخنہ اندازی کی گئی۔ یہ توڑ پھوڑ ’کرنی سینا‘ نامی ٹھاکروں کی تنظیم نے کی تھی۔ کرنی سینا کو یہ شک تھا کہ فلم میں خلجی اور پدماوتی کی محبت دکھائی گئی ہے حالانکہ فلم میں ایسا کچھ نہیں تھا۔ بہر حال فلم کی وجہ سے اصل زندگی میں ہنگامہ ہونے کے بعد اب پردے کے علاء الدین خلجی اور پدماوتی رشتہ ازدواج میں منسلک ہو گئے ہیں، لیکن کہیں کوئی ہنگامہ نہیں ہوا۔

میڈیا کا ایک حصہ یہ ہیڈ لائن ضرور لگا رہا ہے کہ باجی راؤ کی ہوئی مستانی لیکن یہ کہنے کی ہمت میڈیا کی نہیں ہو رہی کہ خلجی کی ہوئی پدماوتی۔

14 Nov 2018, 3:05 PM

بالی ووڈ کی معروف اداکارہ دیپیکا پادوکون اور اداکار رنویر سنگھ کی جوڑی 6 سالوں کی قربت کے بعد آج اٹلی کے لیک کومو نامی مقام پر رشتہ ازدواج میں منسلک ہونے جا رہے ہیں۔ یہ شادی بالی ووڈ کی اس سال کی سب سے بڑی شادی مانی جا رہی ہے۔ رواں سال سونم کپور اور آنند آہوجہ کی بھی شادی ہوئی ہے لیکن دیپیکا اور رنویر کی شادی اور مقام تقریب بحث کا موضوع بنی ہوئی ہے۔

ہندوستانی وقت کے مطابق دیپیکا اور رنویر کی شادی 2 سے 5 بجے کے درمیان ہوگی۔ اٹلی میں اس وقت صبح کا وقت ہوگا۔ میڈیا رپورٹوں کے مطابق باراتیوں کے لئے بریک فاسٹ کا خاص انتظام کیا گیا تھا اور انہیں پنجابی اور اطالوی کھانے پیش کئے گئے۔

آج یعنی 14 نومبر کو کونکنی رسم و رواج کے مطابق شادی کرائی جا رہی ہے۔ کونکنی روایات کے مطابق دولہا اور دلہن کو 4 پھیرے لینے ہوں گے۔ شادی شام 5 بجے اختتام پزیر ہو جائے گی۔

اب 15 نومبر کو سندھی رسم و رواج کے ساتھ شادی ہوگی۔ اس کے بعد 21 نومبر کو بنگلورو اور 28 نومبر کو ممبئی میں گرینڈ ریسیپشن ہوں گے جن میں مشہور ہستیاں شامل ہوں گی۔

میڈیا چینلوں کا دعوی ہے کہ وہ مقام شادی تقریب کے نزدیک خیمہ زن ہیں۔ بتایا جا رہا ہے کہ مہمان مقام تقریب تک پہنچ چکے ہیں اور رنویر سی-پلین سے انٹری کریں گے۔ شادی کا انتظام واٹر للی میں کیا گیا ہے، اس جگہ کو دلہن کی طرح سجایا گیا ہے۔ تقریب کے دوران ہندوستانی میوزک بج رہا ہے۔ حفاظت کے سخت انتظامات کئے گئے ہیں۔ پانی میں بھی سیکورٹی اہلکاروں کو تعینات کیا گیا ہے۔ تقریباً 40 مہمان شادی میں شامل ہو رہے ہیں۔

واٹر للی ایک ولا ہے جوکہ دراصل ایک میوزیم ہے۔ اس جگہ پر ٹھہرنے کا انتظام نہیں ہے یہی وجہ ہے کہ دونوں ستاروں کے اہل خانہ اور مہمانوں کو ویڈنگ وینو سے کچھ دور قیام کرنا پڑا ہے۔

فلم فیئر کی ایک رپورٹ کے مطابق شادی میں شاہ رخ خان اور سنجے لیلا بھنسالی کسی بھی وقت پہنچ سکتے ہیں۔