مراٹھی فلم ’گوندھل‘ آسکر کے لیے ہندوستان کی سرکاری انٹری کے طور پر منتخب، بے چین ازدواجی زندگی کی کہانی

ممبئی: مراٹھی زبان کی فلم ’گوندھل‘ کو 99ویں اکیڈمی ایوارڈز، یعنی آسکر 2027 کے لیے ہندوستان کی سرکاری انٹری کے طور پر منتخب کیا گیا ہے۔ فلم فیڈریشن آف انڈیا (ایف ایف آئی) نے جمعہ کو ممبئی میں اس کا باضابطہ اعلان کیا۔ فلم کو بہترین بین الاقوامی فیچر فلم کی کیٹیگری میں ہندوستان کی نمائندگی کا موقع ملے گا۔

فلم فیڈریشن آف انڈیا کی انتخابی کمیٹی نے آسکر انٹری کے لیے مختلف زبانوں کی مجموعی طور پر 33 فلموں پر غور کیا۔ کمیٹی کے چیئرمین پی شیشادری نے بتایا کہ جیوری نے گزشتہ 10 دنوں کے دوران ان تمام فلموں کو دیکھا۔ ’گوندھل‘ کے علاوہ ’انگھ‘ اور ’اکیس‘ بھی آخری تین فلموں کی فہرست میں شامل تھیں۔

سنتوش داؤکھر کی تحریر اور ہدایت کاری میں بنی ’گوندھل‘ کی کہانی دیہی مہاراشٹر کے پس منظر میں پیش کی گئی ہے۔ فلم میں مہاراشٹر کی روایتی ’گوندھل‘ رسم کو کہانی کا اہم پس منظر بنایا گیا ہے۔ گوندھل ایک رات بھر جاری رہنے والی روایتی لوک پیش کش ہے، جس میں موسیقی، رقص اور دیومالائی داستانوں کا امتزاج ہوتا ہے۔

فلم کی کہانی سمن نامی خاتون کے گرد گھومتی ہے، جو ایک جابرانہ ازدواجی زندگی میں پھنسی ہوئی ہے۔ اپنی اس صورتحال سے نکلنے کے لیے وہ اپنے عاشق کے ساتھ مل کر شوہر کے قتل کی سازش کرتی ہے اور فرار ہونے کا منصوبہ بناتی ہے۔ فلم میں ایشیتا دیشمکھ مرکزی کردار میں ہیں، جبکہ کشور کدم، یوگیش سوہونی، نشاد بھوئر اور انوج پربھو بھی اہم کردار ادا کر رہے ہیں۔

آسکر 2027 کے لیے ہندوستان کی جانب سے بھیجی گئی 33 فلموں میں ’گوندھل‘ کے علاوہ ’حق‘، ’دھرندھر‘، ’دھورندھر: دی ریوینج‘، ’120 بہادر‘ اور ’ہنومان انش‘ سمیت کئی دیگر فلمیں شامل تھیں۔ ’گوندھل‘ ہندوستان کی جانب سے آسکر کے لیے بھیجی جانے والی چوتھی مراٹھی فلم ہے۔ اس سے قبل ’شواس‘، ’ہریش چندراچی فیکٹری‘ اور ’کورٹ‘ ہندوستان کی سرکاری انٹری کے طور پر آسکر کی دوڑ میں شامل ہو چکی ہیں۔

بہترین بین الاقوامی فیچر فلم کی کیٹیگری میں اب تک کسی ہندوستانی فلم نے آسکر ایوارڈ نہیں جیتا ہے۔ اس کیٹیگری میں ہندوستان کی ’مدر انڈیا‘، ’سلام بامبے‘ اور ’لگان‘ کو نامزدگی مل چکی ہے۔ دیپا مہتا کی ’واٹر‘ بھی اس کیٹیگری میں نامزد ہوئی تھی، تاہم اسے ہندوستان نہیں بلکہ کینیڈا کی جانب سے پیش کیا گیا تھا۔

99ویں اکیڈمی ایوارڈز کی تقریب 14 مارچ 2027 کو لاس اینجلس کے ڈولبی تھیٹر میں منعقد ہوگی۔ 2026 میں ریلیز ہونے والی فلمیں اس آسکر کے لیے اہل ہوں گی، جبکہ نامزدگیوں کا اعلان 21 جنوری 2027 کو کیا جائے گا۔