ڈان 3 میں تین نسلوں کے ڈان کا امتزاج؛ امیتابھ بچن، شاہ رخ خان اور رنویر سنگھ ایک ساتھ!

ممبئی: بالی ووڈ کی مقبول ترین فرنچائز ڈان ایک نئے تاریخی لمحے کی جانب بڑھ رہی ہے۔ بتایا جا رہا ہے کہ رنویر سنگھ کی مرکزی اداکاری والی ڈان 3 میں امیتابھ بچن اور شاہ رخ خان بھی خصوصی کیمیو کے ذریعے شامل ہو سکتے ہیں۔ اگر یہ منصوبہ حقیقت بن گیا تو یہ پہلا موقع ہوگا جب تین نسلوں کے ڈان – امیتابھ بچن، شاہ رخ خان اور رنویر سنگھ – ایک ساتھ اسکرین پر نظر آئیں گے۔

فلم کے ڈائریکٹر اور پروڈیوسر فرحان اختر نے اس سے قبل 2006 میں ڈان اور 2011 میں ڈان 2 بنائی تھی۔ دونوں فلموں میں شاہ رخ خان نے مرکزی کردار ادا کیا تھا، جو اصل میں 1978 کی سپرہٹ فلم ڈان کا ریمیک تھی۔ اس فلم میں امیتابھ بچن نے یادگار انداز میں ڈان کا کردار نبھایا تھا، جسے بعد میں شاہ رخ نے آگے بڑھایا۔ اب رنویر سنگھ فرنچائز کی نئی شکل میں سامنے آ رہے ہیں۔

رپورٹس کے مطابق فرحان اختر نے نہ صرف رنویر سنگھ بلکہ امیتابھ بچن اور شاہ رخ خان کو بھی فلم کا حصہ بنانے کی کوشش کی ہے۔ دونوں اسٹارز کے ساتھ بات چیت جاری ہے اور اگر سب کچھ درست رہا تو مداحوں کو ایک شاندار سرپرائز مل سکتا ہے۔ اگرچہ ابھی تک باضابطہ تصدیق نہیں ہوئی ہے لیکن صرف اس خبر نے ہی مداحوں کا جوش و خروش بڑھا دیا ہے۔

سوشل میڈیا پر شائقین اپنی خوشی کا اظہار کر رہے ہیں۔ ایک صارف نے لکھا، ’’جب تینوں ڈان ایک ساتھ آئیں گے تو تمام ریکارڈ ٹوٹ جائیں گے۔‘‘ ایک اور نے کہا، ’’یہ لمحہ بالی ووڈ کی تاریخ کا سب سے بڑا کراس اوور ہوگا۔‘‘

ڈان 3 میں رنویر سنگھ کے ساتھ پہلی بار کیارا آڈوانی جوڑی بنائیں گی۔ اس کے علاوہ نوجوان اداکارہ شروری واگھ بھی فلم میں اہم کردار نبھا رہی ہیں۔ بتایا جاتا ہے کہ شروری نے اسکرپٹ سنتے ہی فوراً اس فلم کا حصہ بننے کے لیے ہامی بھر لی تھی۔ دونوں اداکارائیں اس بڑے پروجیکٹ میں شامل ہو کر بے حد پرجوش ہیں۔

ڈان فرنچائز مالی اعتبار سے بھی کامیاب رہی ہے۔ 2006 میں ریلیز ہونے والی پہلی فلم 38 کروڑ روپے کے بجٹ میں بنی تھی اور اس نے 100 کروڑ روپے سے زیادہ کا بزنس کیا تھا۔ اس کے بعد 2011 میں آئی ڈان 2 نے 203 کروڑ روپے سے زائد کما کر ریکارڈ بنایا۔ دونوں فلموں کی ہدایت کاری فرحان اختر نے کی اور پروڈکشن ان کے بینر ایکسل انٹرٹینمنٹ اور ریتیش سدھوانی کے ساتھ کیا تھا۔