’تم مسکرانے کی وجہ تھیں‘، بونی کپور کا شری دیوی کے نام پیغام

شری دیوی کا دبئی میں اچانک انتقال ہو گیا۔ اس کے بعد وہاں پوسٹ مارٹم، قانونی کارروائیوں میں کئی دن گزر گئے بہرحال گزشتہ روز ان کی آخری رسومات ادا ہو چکی ہیں۔ لیکن ان کی یادیں لوگوں کے ذہنوں میں تازہ بنی ہوئی ہیں۔ بدھ کی دیر شام جب شری دیوی کے ٹوئٹر ہینڈل سے ایک ٹوئٹ کیا گیا تو لوگ دنگ رہ گئے۔

یہ ٹوئٹ، جوایک دوست کے نام، محبوب، معشوقہ، زوجہ، ذمہ دار والدہ، اہلیہ اور اس ماں کے نام تھا جو اپنے بچوں کواس دنیا میں اکیلا چھوڑ کر چلی گئی اور یہ پیغام خود بونی کپور نے تحریر کیا ہے۔

بونی کپور نے لکھا ہے کہ آپ سبھی سے درخواست ہے کہ رنج وغم کے ان لمحات میں ہمیں تنہا ماتم منانے دیں۔ اگر شری دیوی کے بارے میں بات کرنی ہے توان کے فن، ان کی فلموں کے بارے میں بات کریں اور انہیں یاد کریں۔ اپنے پیغام میں بونی کپور نے لکھا:

’’ایک دوست ، بیوی اور اپنی تین جواں سال بیٹیوں کی ماں کو کھو دینا ایک ایسا صدمہ اور خسارہ ہے جسے الفاظ میں بیان کرنا مشکل ہے۔ میں اپنے خاندان، دوستوں، ساتھیوں، خیرخواہوں اور میری شری دیوی کے بے شمار مداحوں کا مشکوروممنون ہوں جو ایسے وقت میں چٹان کی طرح ہمارے ساتھ ڈٹے رہے۔ میں خوش قسمت ہوں جو میرے پاس ارجن اور انشولا کا ساتھ اور ان کی محبت ہے یہ دونوں میرے، خوشی اور جہانوی کے لئے طاقت کے ستون ہیں۔ ہم نے ایک خاندان کی طرح اس ناقابل برداشت غم کا سامنا کیا ہے۔ ‘‘

’’اب جبکہ ہم انہیں الوداع کہہ رہے ہیں تو میری آپ سے مؤدبانہ درخواست ہے کہ ہمیں اس رنج وغم میں ماتم منانے دیں اور ہماری اس صورت حال اور ضرورت کا احترام کریں۔ اگر آپ کو شری دیوی کے بارے میں بات کرنی ہے تو ان کے فن، ان کی فلموں کے بارے میں بات کریں اور انہیں یاد کریں، جو آپ سب کو ان سے جوڑتی ہیں۔ وہ ایک ایسی اداکارہ تھیں جن کا مقام کوئی نہیں لے سکتا۔ ان کی اس خوبی کے لئے انہیں بے شمار محبت اور احترام۔ کسی اداکار کی زندگی پر کبھی پردہ نہیں پڑتا کیوں کہ وہ ہمیشہ سلور اسکرین پر تابناک رہتا ہے۔‘‘

’’مجھے اس وقت صرف ایک ہی فکر ہے اور وہ ہے میری بیٹیوں کی حفاظت کرنا اور شری کے بغیر زندگی گزارنے کی راہ تلاش کرنا۔ وہ ہماری زندگی تھی، ہماری طاقت تھی اور ہمیشہ مسکراتے رہنے کی وجہ تھی۔ ہم ان سے بے پناہ محبت کرتے رہیں گے۔‘‘

’’تمہاری روح کو سکون پہنچے، میری محبت۔ ہماری زندگیاں اب کبھی پہلے جیسی نہیں ہوں گی۔‘‘

شری دیوی کی آخری رسومات: تصویری جھلکیاں

• سبھی تصویریں یو این آئی