آشا بھوسلے کے آخری دیدار اور الوداع کی تیاریاں مکمل، آخری رسومات آج ممبئی میں آج ہوں گی ادا

عظیم گلوکارہ آشا بھوسلے کے انتقال کے بعد آج ممبئی میں ان کی آخری رسومات ادا کرنے کی تیاریاں مکمل کر لی گئی ہیں، جہاں ہزاروں مداح اپنی محبوب آواز کو آخری بار دیکھنے کے لیے جمع ہو رہے ہیں۔ اہل خانہ کے مطابق پیر کی صبح گرینڈ لوور بلڈنگ میں واقع ان کی رہائش گاہ میں صبح تقریباً 11 بجے سے آخری دیدار کا سلسلہ شروع ہوگا، جہاں عام لوگ، فلمی شخصیات اور سیاسی رہنما بڑی تعداد میں پہنچ رہے ہیں۔

رپورٹ کے مطابق، آخری دیدار کے لیے خصوصی انتظامات کیے گئے ہیں تاکہ عوام کو کسی دشواری کے بغیر اپنے پسندیدہ گلوکارہ کو خراج عقیدت پیش کرنے کا موقع مل سکے۔ سکیورٹی کے سخت انتظامات کے ساتھ ساتھ مقامی انتظامیہ بھی موقع پر موجود ہے، جبکہ کئی اہم شخصیات کی آمد کا سلسلہ جاری ہے۔

اہل خانہ کے مطابق شام 4 بجے ممبئی کے معروف مقام شیواجی پارک میں سرکاری اعزاز کے ساتھ ان کی آخری رسومات ادا کی جائیں گی۔ اس موقع پر سرکاری سطح پر مکمل پروٹوکول اختیار کیا جائے گا اور انہیں مکمل احترام کے ساتھ سپردِ خاک کیا جائے گا۔ یاد رہے کہ اسی مقام پر ان کی بہن لتامنگیشکر کی آخری رسومات بھی انجام دی گئی تھیں۔

یاد رہے کہ آشا بھوسلے کا انتقال اتوار کے روز ممبئی کے بریچ کینڈی اسپتال میں ہوا تھا، جہاں وہ علالت کے باعث زیر علاج تھیں۔ ان کے بیٹے آنند بھوسلے نے ان کے انتقال کی تصدیق کی تھی۔ ان کے انتقال کی خبر کے بعد سے ہی ملک بھر میں غم کی فضا قائم ہے، جو آج آخری رسومات کے موقع پر اپنے عروج پر پہنچ گئی ہے۔

لوئر پریل کی سڑکوں پر غیر معمولی خاموشی اور سنجیدگی دیکھی جا رہی ہے، جبکہ ان کے چاہنے والے اشک بار آنکھوں کے ساتھ ان کے گائے ہوئے نغمے دہرا رہے ہیں۔ کئی افراد صبح سے ہی ان کی رہائش گاہ کے باہر موجود ہیں تاکہ آخری دیدار کا موقع حاصل کر سکیں۔

آشا بھوسلے نے اپنی آواز کے ذریعے کئی نسلوں کو متاثر کیا اور ان کی یادیں آج ہر دل میں تازہ ہیں۔ آج جب انہیں آخری وداع دی جا رہی ہے تو پورا ملک ایک ساتھ سوگوار نظر آ رہا ہے، اور ہر زبان پر یہی الفاظ ہیں کہ ایک عہد اپنے اختتام کو پہنچ گیا۔