دنیا بھر سے 60 ہزار افراد کو فریضہ حج انجام دینے کی اجازت، سعودی حکومت کا اعلان

پاکستانی میڈیا کی رپورٹ کے مطابق عمران خان کے نمائندہ برائے مذہبی ہم آہنگی حافظ طاہر محمود اشرفی نے سعودی فیصلے کی تصدیق کی اور کہا کہ سعودی حکومت نے دنیا بھر سے عازمین حج کی آمد کی منظوری دے دی ہے۔

حج بیت اللہ
حج بیت اللہ
user

قومی آوازبیورو

اسلام آباد: سعودی عرب کی حکومت نے اس سال دنیا بھر سے صرف 60 ہزار افراد کو حج پر آنے کی اجازت دی ہے۔ کورونا کی وبا کے پیش نظر عازمین حج کو سخت پروٹوکول اور احتیاطی تدابیر پر عمل کرنا ہوگا۔

پاکستانی میڈیا کی رپورٹ کے مطابق وزیراعظم عمران خان کے نمائندہ خصوصی برائے مذہبی ہم آہنگی و مشرق وسطیٰ حافظ طاہر محمود اشرفی نے سعودی فیصلے کی تصدیق کی اور کہا کہ سعودی حکومت نے دنیا بھر سے عازمین حج کی آمد کی منظوری دے دی ہے۔ انہوں نے کہا کہ رواں سال دنیا بھر سے 60 ہزار افراد حج پر جا سکیں گے، جن میں پاکستانی شہری بھی شامل ہوں گے۔

انہوں نے کہا کہ پاکستان سے کتنے عازمینِ حج سعودی عرب جاسکیں گے، اس بارے میں پاکستان کو بعد میں مطلع کیا جائے گا۔ طاہر اشرفی کا کہنا تھا کہ 18 سال سے کم اور 60 سے زائد عمر کے افراد حج کے لئے نہیں جا سکیں گے، جبکہ عازمین کو کورونا ویکسینیشن کے ساتھ سعودی عرب میں 3 دن قرنطینہ کرنا ہوگا۔

خیال رہے کہ سعودی حکومت کی جانب سے عازمین حج کے لئے کورونا ویکسینیشن کی شرط کے بعد پاکستانی وزارت خارجہ نے سعودی حکومت سے رابطہ کیا ہے۔ پاکستان نے سعودی حکومت سے چینی ویکسین رجسٹرڈ کرنے کی درخواست کی ہے۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔