سعودی عرب نے سفر پر لگی پابندی کی مدت ایک ہفتے اور بڑھائی

برطانیہ سے آنے والی کورونا کے نئے اسٹرین کی خبروں سے ایک بار پھر پوری دنیا میں خوف پھیل گیا ہے۔ اس خوف کے بیچ سعودی عرب نے کورونا کے نئے اسٹرین کو پھیلنے سے روکنے کےلئے غیرملکی پروازوں پر لگائی گئی پابندی کی مدت ایک ہفتے اور بڑھا دی ہے۔ سعودی عرب کی سرکاری نیوز ایجنسی ایس پی اے نے پیر کو یہ اطلاع دی ہے۔

واضح رہے کہ سعودی عرب نے کورونا کے نئے اسٹرین کو ملک میں پھیلنے سے روکنے کےلئے 21 دسمبر کو بین الاقوامی پروازوں،بحری راستوں اور سرحدوں کو بند کرنے کا اعلان کیا تھا۔

ایجنسی نے کہا ہے کہ حکومت نے موجودہ حالات کا جائزہ لینے کے بعد شہریوں کی حفاظت کو توجہ میں رکھتے ہوئے بین الاقوامی سفر پر لگائی گئی پابندی کی مدت کو ایک ہفتے کےلئے بڑھانے کا فیصلہ کیا ہے۔ اس مدت کے بڑھانےسے سعودی عرب کو اقصادی طور پر بہت نقصان ہوگا۔جبکہ سرکاری ایجنسی نے کہا ہے کہ اس پابندی کا خوردنی اشیا اور دیگر اشیا کی سپلائی پر اثر نہیں ہوگا۔ ایجنسی نے کہا کہ غیر مقیم لوگوں کو وزارت صحت کے ذریعہ احتیاطی اقدامات کے ساتھ اپنے ملک جانے کی اجازت ہے۔

واضح رہے کہ برطانیہ میں کورونا وائرس کے نئے اسٹرین کے سامنے آنے کے بعد دنیا کے کئی ملکوں نے احتیاط کے طورپر بین الاقوامی سفر پر پابندی لگا دی ہے۔ کورونا کا نیا اسٹرین برطانیہ کے علاوہ کناڈا ،ڈین مارک،بیلجیم ،نیدرلینڈ، جنوبی افریقہ ،آسٹریلیا ،لبنان اور اردن میں پایا گیا ہے۔