ترکی میں بڑے پیمانے پر جنگل میں آگ، لوگ انخلا پر مجبور

شمال مغربی اور شمالی ترکی میں آگ نے دو جنگلوں کو اپنی لپٹ میں لے لیا ہے۔مقامی حکام نے بتایا کہ یہ آگ ہفتے کے روز لگی جو بڑے پیمانے پر جنگل میں پھیل گئی۔ جس کی وجہ سے لوگوں کا انخلاء کا آغاز ہوگیا ہے۔ تیز ہواؤں نے رہائشی علاقوں کی طرف شعلوں کو دھکیل دیا اور گاڑیاں سڑکوں پر پھنس کر رہ گئیں ۔

صوبہ برسا میں کیسٹل اور گرسو اضلاع کے درمیان ایک بے قابو آگ تیزی سے گاؤإں کی طرف پھیل گئی ، جس سے لوگوں کو انخلا پر مجبور ہونا پڑا ۔ آن لائن ویڈیوز میں دکھایا گیا ہے کہ مقامی افراد پیدل بھاگ رہے ہیں کیونکہ آگ نے ایک اہم سڑک کو اپنی لپیٹ میں لے لیا ہے ۔ آگ اتنی زبردست ہے کہ شہری امدادی گاڑیوں سمیت مختلف گاڑیاں بھی پھنس گئی ہیں۔

ترکی کے وزیر زراعت اور جنگلات ابراہیم یومکلی نے ہفتے کے روز ملک بھر میں 76 فعال آگ کی تصدیق کی ہے جس میں 28 جنگلات اور 48 دیہی علاقے شامل ہیں۔ انہوں نے کہا کہ فائر فائٹنگ ٹیمیں مسلسل آگ پر قابو پانے کی کوشش کررہی ہیں۔ برسا میں ہفتے کے روز درجہ حرارت 38 ڈگری سینٹی گریڈ اور کارابوک میں 37 ڈگری سینٹی گریڈ تک پہنچ گیا ، آئند دو دنوں میں درجہ حرارت اس سے بھی زیادہ پہچنے کی پیش گوئی کی گئی ہے ۔