امریکی صدر کی جدہ میں سعودی ولی عہد سے اہم امور پر بات چیت

مریکی صدر نے کہا کہ ان کے مملکت کے دورے کی وجہ امریکی مفادات سے بڑھ کر ہے۔ یہ دورہ خطے سے انخلاء کر کے سابقہ غلطیوں کو درست کرنے کا ایک موقع ہے۔

فائل تصویر آئی اے این ایس
فائل تصویر آئی اے این ایس
user

قومی آوازبیورو

سعودی عرب کے دورے پر آئے امریکی صدر جو بائیڈن نے کل شام جدہ پہنچنے کے بعد اعلیٰ اختیاراتی وفد کے ہمراہ سعودی ولی عہد شہزادہ محمد بن سلمان سے ملاقات کی۔یہ ملاقات جدہ کے پیس پیلس میں ہوئی جس میں دونوں ملکوں کے اعلیٰ حکام موجود تھے۔

قبل ازیں شہزادہ محمد بن سلمان نے امریکی صدر اور ان کے ہمراہ آئے وفد کا شاہی محل میں استقبال کیا۔ امریکی صدر سعودی فرمانروا شاہ سلمان بن عبدالعزیز آل سعود کی دعوت پر جمعہ کی شام جدہ پہنچے جہاں مکہ کے گورنر شہزادہ خالد الفیصل اور امریکا میں سعودی عرب کی سفیر شہزادی ریما بنت بندر بن سلطان سمیت دیگر حکام نے استقبال کیا۔ امریکی صدر کل ہفتے کو جدہ میں منعقدہ ’خلیج 3+‘ کانفرنس میں شرکت کریں گے۔


امریکی صدر جو بائیڈن اور سعودی شاہ سلمان کے درمیان دو طرفہ مذاکرات کے سیشن کے بعد ولی عہد شہزادہ محمد بن سلمان نے مشترکہ سربراہی اجلاس سے قبل دونوں ممالک کے حکام کی موجودگی میں جو بائیڈن سے ملاقات کی۔ملاقات کے بعد ولی عہد اور بائیڈن کے درمیان جدہ کے السلام محل میں دو طرفہ بات چیت ہوئی۔

سعودی عرب کے دورے کے دوسرے روز صدر بائیڈن جدہ میں علاقائی کانفرنس میں شرکت کریں گے جہاں وہ مصر، اردن اور عراق سمیت خلیجی ممالک کی قیادت سے موجودہ حالات کے تناظر میں علاقائی اور بین الاقوامی پیش رفت،خطے کے شراکت داروں کے ساتھ تعاون اور مسلسل ہم آہنگی کی کوششوں کی حمایت کو فروغ دینے پر بات کریں گے۔


وائٹ ہاؤس نے کہا ہے کہ مملکت میں صدر بائیڈن کی بات چیت میں دونوں ممالک کے درمیان تعاون کے پہلوؤں پر بات کی جائے گی اور خطے اور دنیا کو درپیش چیلنجوں کا مقابلہ کرنے کے طریقوں پر تبادلہ خیال کیا جائے گا۔

مشرق وسطیٰ کے دورے پر آئے امریکی صدر نے کہا کہ ان کے مملکت کے دورے کی وجہ امریکی مفادات سے بڑھ کر ہے۔ یہ دورہ خطے سے انخلاء کر کے سابقہ غلطیوں کو درست کرنے کا ایک موقع ہے۔ (بشکریہ العربیہ ڈاٹ نیٹ)

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔