ویبھو سوریہ ونشی نے 25 گیندوں میں بنا ڈالی سنچری، مگر نہیں توڑ پائے شریئس ایئر کا ریکارڈ

میدان کوئی بھی ہو،  حالات کیسے بھی ہوں، 22 گز کے ایریا میں اگر بے خوف ویبھو سوریہ ونشی کھڑے ہوں تو بلے سے طوفان تو آنا ہی ہے۔ ایسا ہی کیون پیٹرسن کے یو ٹیوب چینل ’دی سویچ‘ کے تازہ ایپی سوڈ میں بھی دیکھنے کو ملا۔ کیون پیٹرن نے پیر (25 مئی) کو اپنے یو ٹیوب چینل پر ویبھو سوریہ ونشی سے متعلق ایپی سوڈ اپلوڈ کیا جس پر دیکھتے ہی دیکھتے ’لائکس‘ کا سیلاب آگیا۔ کیون پیٹرسن نے اپنے ایپی سوڈ میں 50 گیندوں میں سنچری بنانے کا چیلنج رکھا مگر ویبھو سوریہ ونشی نے اس چیلنج کو 25 گیندوں میں ہی ختم کر دیا۔

ویبھو سوریہ ونشی نے چھکوں کا ڈھیر لگاتے ہوئے 25 گیندوں میں ہی اپنی سنچری پوری کرلی۔ حالانکہ وہ کیون پیٹرن کے شو پر لگائی گئی سب سے تیز سنچری کے شریئس ایئر کا ریکارڈ نہیں توڑ پائے۔ شریئس ایئر نے کیون پیٹرسن کے شو میں صرف 22 گیندوں میں ہی سنچری مکمل کردی تھی۔ مطلب یہ ہے کہ ویبھو سوریہ ونشی 3 گیند سے ٰشریئس ایئر کا ریکارڈ توڑنے میں ناکام رہے۔ ویسے شو میں کیون پیٹرسن کے پوچھنے پر انہوں نے کہا تھا کہ وہ ایئر کا ریکارڈ توڑ دیں گے مگر ایسا نہیں ہو سکا۔

پیٹرسن کے شو میں سب سے تیز سنچری جمانے والوں کی لسٹ میں ویبھو سوریہ ونشی دوسرے نمبر پر ہیں، ان کے بعد ویسٹ انڈیز کے نکولس پورن 28 گیندوں پر سنچری بنا کر تیسرے نمبر پر ہیں۔ اے بی ڈیویلئرس نے 30 گیندوں میں سنچری بنائی ہے جبکہ یشسوی جیسوال نے سنچری بنانے کے لیے 47 گیندیں کھیلی ہیں۔

ویبھو سوریہ ونشی کی اننگ کے دوران کیون پیٹرسن نے ان سے کچھ سوال بھی کئے، جن کے انہوں نے جواب دیئے۔ پیٹرسن نے ویبھو سے پوچھا کہ انہیں کیا پسند ہے، پہلے بلے بازی کرنا یا رن چیز کرنا؟ اس پر ویبھو نے کہا کہ دونوں۔ پیٹرسن نے اگلا سوال کیا کہ جب وہ نائنٹیز میں کھیل رہے ہوتے ہیں تو دماغ میں کیا چل رہا ہوتا ہے؟ اس پر ویبھو نے کہا کہ وہ بس اپنا نیچورل گیم کھیلنے پر فوکس کرتے ہیں۔ پیٹرسن نے ویبھو سوریہ ونشی سے یہ بھی پوچھا کہ انہوں نے سب سے بڑی اننگ کب کھیلی تھی؟ ویبھو نے کہا کہ ایک گھریلو میچ کے دوران جہاں انہوں نے 50 اوور بلے بازی کی تھی اور اکیلے 353 رن بنائے تھے۔