’راتوں رات کچھ نہیں بدلتا‘، اسپن کے خلاف بلے بازوں کی جدوجہد کے متعلق ونڈے کپتان کے ایل راہل کا بیان

ہندوستان اور جنوبی افریقہ کے درمیان 3 میچوں کی ونڈے سیریز کا مقابلہ اتوار سے کھیلا جانا ہے۔ رانچی میں کھیلے جانے والے پہلے مقابلہ سے قبل شبمن گل کی عدم موجودگی میں ٹیم کی کپتانی کا ذمہ سنبھال رہے کے ایل راہل نے ہفتہ (29 نومبر) کو پریس کانفرنس سے خطاب کیا۔ اس دوران انہوں نے قبول کیا کہ ٹیم انڈیا کے بلے بازوں کا گھریلو پچوں پر اسپین کے خلاف جدوجہد کرنا تشویشناک امر ہے۔ انہوں نے یہ بھی کہا کہ اس سے نمٹنے کے متعلق فی الحال میرے پاس کوئی جواب نہیں ہے۔

واضح رہے کہ حال ہی میں جنوبی افریقہ نے ہندوستانی ٹیم کو 2 میچوں کی ٹیسٹ سیریز میں کلین سویپ کر دیا ہے۔ اس سے قبل نیوزی لینڈ نے بھی گزشتہ سال ہندوستان کو 3 میچوں کی ٹیسٹ سیریز میں کلین سویپ کر دیا تھا۔ دونوں سیریز میں ہندوستانی بلے باز غیر ملکی اسپنرز کے خلاف جدوجہد کرتے نظر آئے۔

رانچی میں پہلے ون ڈے سے قبل پریس کانفرنس سے خطاب کرتے ہوئے ہندوستانی کپتان کے ایل راہل نے کہا کہ ’’ہم نے گزشتہ کچھ سیزن میں اسپن اچھا نہیں کھیلا۔ میں واقعی نہیں جانتا کہ ہم پہلے ایسا کیوں کر پائے اور اب کیوں نہیں کر پا رہے ہیں۔ اس کا میرے پاس کوئی جواب نہیں ہے۔ ہم صرف اتنا کر سکتے ہیں کہ انفرادی طور پر اور بطور بلے بازی گروپ کے یہ دیکھیں کہ کیسے بہتر ہو سکتے ہیں۔‘‘ ان کا کہنا ہے کہ بلے بازوں کو تکنیک اور حکمت عملی میں تبدیلیاں کرنی ہوں گی اور یہ ایک طویل عمل ہوگا، راتوں رات کچھ بھی نہیں بدلتا۔

کے ایل راہل کا کہنا ہے کہ ہم بہتری کی ضروریات کو دیکھیں گے اور سری لنکا اور آسٹریلیا کی سیریز تک ہم بہتر طریقے سے تیار ہو جائیں گے۔ ساتھ ہی انہوں نے کہا کہ ہم سینئر کھلاڑیوں سے بھی مشورہ لیں گے جنہوں نے اسپن کو بہت اچھا کھیلا ہے۔ کے ایل راہل کے مطابق ہندوستانی بلے بازوں کو انفرادی جواب تلاش کرنے ہوں گے۔ اگر وہ اسپن کے خلاف روایتی طور پر کامیاب ہونا چاہتے ہیں تو انہیں اپنی تکنیک کو بہتر بنانا ہوگا۔

وراٹ کوہلی کی سخت ٹریننگ سیشن کے بارے میں پوچھے جانے پر راہل نے ون ڈے فارمیٹ میں اسٹرائیک روٹیشن کی اہمیت کو تسلیم کیا۔ ان کا کہنا ہے کہ ون ڈے میں ہر ایک رن اتنا ہی اہم ہے جتنا کہ چوکا اور چھکا۔ وراٹ اس میں ماہر ہیں، ہم سب ان سے سیکھتے رہتے ہیں۔ وہ واپسی کے لیے پرجوش ہیں، اور ان کی موجودگی ہمیشہ اہم ہوتی ہے۔ جب ان سے کوہلی اور روہت شرما دونوں کی ٹیم میں واپسی کے متعلق پوچھا گیا تو انہوں نے کہا کہ ’’ان دونوں کی اہمیت بہت زیادہ ہے۔ ٹیم میں سینئر کھلاڑیوں کا ہونا ڈریسنگ روم کو زیادہ اعتماد دیتا ہے۔ ہمیں بہت خوشی ہے کہ وہ یہاں ہیں۔ جیت حاصل کرنا سب سے اہم چیز ہے، اور ہم اسی پر توجہ مرکوز کر رہے ہیں۔‘‘