جینک سینر بنے ومبلڈن کے نئے چمپئن، کارلوس الکاریز کی جیت کا سلسلہ ٹوٹا

اٹلی کے جینک سینر نے ومبلڈن کے فائنل میں شاندار کھیل کا مظاہرہ کرتے ہوئے دو مرتبہ کے فاتح کارلوس الکاریز کو 6-4، 4-6، 4-6، 4-6 سے ہرا کر اپنے کیریئر کا پہلا ومبلڈن خطاب جیت لیا ہے۔ یہ سینر کا چوتھا گرینڈ سلیم خطاب ہے۔ اس جیت کے ساتھ سینر نے نہ صرف پانچ ہفتے پہلے فرنچ اوپن فائنل میں الکاریز سے ملی شکست کا بدلہ لے لیا ہے بلکہ اسپینش کھلاڑی کی گرینڈ سلیم فائنلز میں ناقابل شکست رہنے کا سلسلہ بھی توڑ دیا۔

اتوار کو کھلیے گئے ومبلڈن کے فائنل میں عالمی نمبر-1 سینر کو میچ کے پہلے سیٹ میں ہار ملی تھی۔ اس کے بعد انہوں نے شاندار واپسی کرتے ہوئے آگے کے سارے سیٹ جیت کر مقابلہ اپنے نام کر لیا۔ الکاریز نے پہلا سیٹ جیت کر سبقت حاصل کر لی لیکن اس کے بعد سینر نے مسلسل تینوں سیٹوں میں ایک جیسی اسکور لائن (6-4، 6-4، 6-4) سے جیت حاصل کی۔

23 سالہ جینک سینر نے فائنل جیتنے کے بعد کہا، ’’یہ لمحہ میرے لیے بے حد خاص ہے۔ ومبلڈن جیتنا ہر کھلاڑی کا خواب ہوتا ہے، اور آج وہ خواب حقیقت بن گیا۔‘‘

ومبلڈن میں یہ شکست کارلوس الکاریز کی 20 میچوں کی مسلسل جیت کا خاتمہ بھی ہے۔ اس سے پہلے انہوں نے 2023 اور 2024 میں سربیا کے نوواک جوکووچ کو شکست دے کر خطاب جیتا تھا۔ سینٹر کورٹ پر وہ 24 میچوں سے مسلسل ناقابل شکست تھے۔

ومبلڈن 2025 کا خطاب جیتنے کے بعد جینک سینر کو 3 ملین پاؤنڈ کی انعامی رقم (ہندوستانی روپے میں 34 کروڑ روپے سے زیادہ) حاصل ہوئی۔ وہیں نائب فاتح کے طور پر الکاریز کو 1 ملین 520 ہزار پاؤنڈ (ہندوستانی روپے میں تقریباً 17 کروڑ) ملے۔ سیمی فائنلسٹ کے طور پر جوکووچ اور فرٹز کو 775 ہزار پاؤنڈ یعنی 9 کروڑ روپے کی انعامی رقم ملی۔