آئی پی ایل 2025: کرناٹک کے نائب وزیر اعلیٰ ڈی کے شیوکمار نے کوہلی سمیت آر سی بی ٹیم کا ایئرپورٹ پر کیا شاندار استقبال

بنگلورو میں چناسوامی اسٹیڈیم کے باہر ہزاروں کی تعداد میں لوگ اپنی فاتح ٹیم کا انتظار کر رہے  ہیں۔ رائل چیلنجرس بنگلورو کی جیت کا جشن ان کے شہر بنگلورو میں پورے دھوم دھام سے منایا جائے گا۔ 3 جون کو احمد آباد کے نریندر مودی اسٹیڈیم میں پنجاب کنگس کو فائنل میں شکست دینے کے بعد آر سی بی نے 18 سال بعد خطاب اپنے نام کیا۔ فاتح ٹیم کا ریاستی نائب وزیر اعلیٰ ڈی کے شیوکمار نے ایئرپورٹ پر شاندار استقبال کیا۔ انہوں نے خاص طور سے مایہ ناز بلے باز وراٹ کوہلی کو گلے لگا کر جیت کی مبارکباد دی اور ساتھ ہی آر سی بی کا جھنڈا بھی لہرایا۔

بنگلورو کے لوگ اپنی ٹیم کے ساتھ پہلی آئی پی ایل ٹرافی جیتنے کا جشن منانا چاہتے ہیں۔ ہر کوئی وراٹ کوہلی کے ساتھ فاتح ٹیم کے تمام کھلاڑیوں کی ایک جھلک دیکھنے کو بے تاب ہے۔ یہی وجہ ہے کہ آر سی بی کے مداحوں کی جم غفیر چناسوامی اسٹیڈیم پہنچ رہی ہے، جہاں جیت کی تقریب کا اہتمام کیا گیا ہے۔ اسٹیڈیم کے باہر لوگ آر سی بی کا نعرہ لگا رہے ہیں۔

واضح ہو کہ 4 جون کو دوپہر 3:30 بجے سے ’آر سی بی وکٹری پریڈ‘ بھی نکلنی تھی، لیکن بنگلورو پولیس نے ٹریفک ایڈوائزری کی وجہ سے اسے منسوخ کر دیا ہے۔ پہلے سے طے پروگرام کے مطابق بنگلورو کی ٹیم کو اوپین بس کے ذریعہ روڈ شو کرتے ہوئے ودھان سودھا سے چناسوامی اسٹیڈیم پہنچنا تھا، لیکن اب کھلاڑی سیدھے اسٹیڈیم پہنچیں گے۔