ایگا سویاتیک نے ومبلڈن کا خطاب جیت کر تاریخ رقم کی، یہ کامیابی حاصل کرنے والی پولینڈ کی پہلی کھلاڑی بنیں

پولینڈ کی ایگا سویاتیک نے وِمبلڈن 2025 کا خاتون کا سنگلز خطاب اپنے نام کر لیا ہے۔ یہ پہلی بار ہے جب 24 سالہ سویاتیک نے ومبلڈن کا خطاب جیتا ہے جبکہ انہوں نے اپنے کیریئر میں اب تک کُل 6 گرینڈ سلیم خطاب جیتے ہیں۔ سویاتیک نے فائنل میں امریکہ کی امانڈا اینی سیمووا کو مسلسل سیٹوں میں 6-0، 6-0 سے ہرا کر تاریخ رقم کر دی۔ امانڈا کا مظاہرہ بے حد مایوس کن رہا کیونکہ وہ فائنل مقابلے میں سویاتیک کو تھوڑی بھی ٹکر نہیں دے سکیں اور ایک بھی سیٹ اپنے نام نہیں کر پائیں۔ فائنل میچ صرف 57 منٹ میں ہی ختم ہو گیا۔

ٹینس کی تاریخ میں ایگا سویاتیک ومبلڈن کا خطاب جیتنے والی پولینڈ کی پہلی کھلاڑی بن گئی ہیں۔ دراصل خاتون پروفیشنل ٹینس کی شروعات 1926 میں ہوئی تھی، اس کے 99 سال بعد یعنی 2025 میں پولینڈ کی کسی خاتون کھلاڑی نے ومبلڈن کا خطاب جیتا ہے۔

سویاتیک کو رافیل نڈال کی طرح کلے کورٹ پر بہرین مظاہرہ کے لیے جانا جاتا ہے اور اب تک وہ 4 مرتبہ فرنچ اوپن کا خطاب جیت چکی ہیں۔ لیکن اس مرتبہ انہوں نے ومبلڈن کے گراس کورٹ پر بھی فتح کا پرچم لہرا کر پوری دنیا کے سامنے اپنا لوہا منوا لیا ہے۔

سویاتیک نے فائنل میچ میں شروعات سے ہی جارحانہ کھیل کا مظاہرہ پیش کیا اور محض 26 منٹ میں پہلا سیٹ 6-0 سے اپنے نام کر لیا۔ پھر دوسرے سیٹ میں بھی انہوں نے زوردار کھیل جاری رکھتے ہوئے6-0  سے جیت حاصل کرلی۔ ان کے سامنے 23 سالہ امریکی کھلاڑی کہیں بھی ٹک نہیں پائیں۔ جیسے ہی پولینڈ کی اس کھلاڑی نے آخری پوائنٹ جیتا، تبھی وہ خوشی اور جذبات کا اظہار کرتی ہوئیں کورٹ پر بیٹھ گئیں۔ وہاں موجود سبھی ٹینس شائقین نے اس شاندار کاردگی کے لیے تالیوں سے ان کا استقبال کیا۔

دلچسپ بات یہ ہے کہ سویاتیک نے اب تک 6 گرینڈ سلیم فائنل کھیلے ہیں اور سبھی میں انہیں کامیابی ملی ہے۔ گرینڈ سلیم فائنل مقابلوں میں ان کا 100 فیصد جیت کا ریکارڈ برقرار ہے۔ اس سے پہلے سویاتیک کبھی ومبلڈن کے خاتون سنگلز مقابلوں کے کواٹر فائنل سے آگے نہیں بڑھ پائی تھیں، لیکن اس مرتبہ خطاب پر قبضہ کرکے انہوں نے اس کمی کو دور کر دیا۔

ومبلڈن کا خطاب جیتنے والی ایگا سویاتیک کو تقریباً 34 کروڑ 74 لاکھ 63 ہزار روپے انعام کے طور پر ملے، جو آئی پی ایل 2025 کی فتح ٹیم سے 14 کروڑ روپے زیادہ ہے۔ وہیں فائنل میں پہنچنے والی امانڈا اینی سیمووا کو 17 کروڑ 41 لاکھ 5 ہزار روپے ملے۔ اس مرتبہ ومبلڈن کی انعامی رقم 7 فیصد بڑھائی گئی ہے۔ اس ٹورنامنٹ کی کُل انعامی رقم 6 ارب 19 کروڑ 64 لاکھ 23 ہزار 500 روپے ہے۔