ایشین گیمز 2026: ہندوستان کو ملا چھٹا ’طلائی‘ تمغہ، خواتین کی 4x400 میٹر ریلے ریس میں بیٹیوں نے کیا کمال

ایشین گیمز 2026 میں ہندوستان کو چھٹا طلائی تمغہ مل گیا ہے۔ یہ تمغہ خواتین کی 4x400 میٹر ریلے ریس میں حاصل ہوا۔ کرن، مچیترا پوومّا، پراچی اور وتھیا رام راج کی ہندوستانی چوکڑی نے یہ طلائی تمغہ جیتا۔ ہندوستان نے یہ ریس 3:29.69 منٹ میں مکمل کی۔ دوسری جانب اس ایونٹ میں بحرین نے چاندی جبکہ چین نے کانسہ کا تمغہ جیتا۔ ہندوستان نے لین 6 سے ریلے کا آغاز کیا اور کرن کو ابتدائی مرحلے کی ذمہ داری سونپی گئی۔ اسپرنٹر کرن نے تیسرے مقام پر بیٹن آگے پہنچایا۔

پوومّا پر فرق کم کرنے کی ذمہ داری آ گئی۔ تجربہ کار پوومّا نے دوسرے مرحلے میں شاندار کارکردگی کا مظاہرہ کیا اور ہندوستان کو آگے کر دیا۔ اس کے بعد انہوں نے پراچی کو بیٹن سونپا، جو پہلے ہی 400 میٹر میں انفرادی کانسہ کا تمغہ جیت چکی تھیں۔ پراچی نے ہندوستان کو تمغے کی دوڑ میں مضبوطی سے برقرار رکھتے ہوئے اس بات کو یقینی بنایا کہ وتھیا کو آخری مرحلے کے لیے اچھی پوزیشن میں بیٹن ملے۔ اس کے بعد آخری لیپ وتھیا کے نام رہا۔ وتھیا نے جلد ہی اپنی رفتار پکڑ لی۔

200 میٹر کے نشان کے قریب وتھیا نے اپنی رفتار تیز کی۔ تاہم بحرین کی سالوا عید ناصر نے پوری طاقت سے پیچھا کیا اور آہستہ آہستہ فرق کم کیا، لیکن وتھیا نے آخری مرحلے کے آغاز میں ہی اتنی برتری حاصل کر لی تھی کہ وہ اس چیلنج کا مقابلہ کر سکیں۔ وِتھیا نے دوڑ کے آخری حصے میں خود پر قابو رکھا اور سب سے پہلے فنش لائن پار کی۔

قابل ذکر ہے کہ ایشین گیمز میں خواتین کی 4x400 ریلے ریس میں ہندوستان کا ہمیشہ سے غلبہ رہا ہے۔ 2002 سے اب تک ہونے والے 7 ایشین گیمز میں اس ایونٹ میں ہندوستان کا یہ چھٹا تمغہ ہے۔ ہانگژو میں اس ایونٹ میں بحرین نے طلائی تمغہ جیتا تھا، جبکہ ہندوستان کو چاندی کا تمغہ ملا تھا۔ اب ایک بار پھر ہندوستانی خواتین کی ٹیم ایشین گیمز میں 4x400  میٹر ریلے ریس کی چمپئن بن گئی ہے۔ ایشین گیمز 2026 میں آج ایتھلیٹکس کے مقابلوں کا آخری دن ہے۔ اس بار ہندوستان کا یہ ایتھلیٹکس میں پہلا اور واحد طلائی تمغہ ہے۔ 2022 ہانگژو ایشین گیمز میں ہندوستان کو ایتھلیٹکس میں 6 طلائی تمغے ملے تھے۔ اس بار ہندوستان نے ایتھلیٹکس میں ایک طلائی تمغے کے علاوہ 9 چاندی اور 14 کانسے کے تمغے جیتے۔ اس طرح مجموعی طور پر تمغوں کی تعداد 24 رہی۔