ویانا میں سینیٹری پیڈز مفت فراہم کرنے کی اسکیم

آسٹریا کی حکومت کے اس اقدام کے تحت ویانا میں پندرہ ہزار خواتین کو مفت سینیٹری پیڈز فراہم کیے جائیں گے۔ ویانا کی ڈپٹی میئر کیتھرین گال کا کہنا ہے کہ خواتین کے لیے مخصوص ایام میں استعمال ہونے والے یہ پیڈز ایک بنیادی ضرورت ہیں۔ انہوں نے مزید کہا، ''ہم چاہتے ہیں کہ اس سہولت سے وہ خواتین بھی مستفید ہوں، جو معاشی مسائل کا سامنا کر رہی ہیں‘‘۔ اس اسکیم کا آغاز گزشتہ ہفتے ہوا۔

ویانا میں قائم دفتر برائے خواتین کی صحت کی سربراہ کرسٹینا ہمیٹنر کے مطابق نوجوانوں کے قریب اسّی یوتھ مراکز اور فوڈ بینکس میں جانے والی ایسی خواتین کو کوپن دیے جائیں گے، جنہیں ان پیڈز کی اشد ضرورت ہوتی ہے۔ بعد ازاں یہ خواتین یہ یہی کوپن دِکھا کر کسی بھی میڈیکل سٹور سے یہ پیڈز مفت حاصل کر سکیں گی۔

ویانا کے ایک ضلع میں اس سے قبل ریڈ باکس پراجیکٹ کے تحت سن 2021 میں تین ماہ کے عرصے میں اسّی ہزار ٹیمپون اور پچانوے ہزار پیڈز مفت تقسیم کیے گیے تھے۔

تحقیق کے مطابق ایک خاتون کو اپنی پوری زندگی میں اوسطا سترہ ہزار سینیٹری پیڈز کی ضرورت ہوتی ہے، جس کی قیمت تقریبا" تین ہزار یورو بنتی ہے۔ ماہرین کا کہنا ہے کہ عالمی سطح پر اس مسئلے کا براہ راست اثر لڑکیوں کی تعلیم اور کام کے مواقع پر پڑتا ہے۔