لڑکیاں اسکول نہ جاسکیں اس لیے انہیں زہر دیا گیا، ایرانی وزیر

ایران کی سرکاری خبر رساں ایجنسی ارنا نے نائب وزیر صحت یوسف پناہی کے حوالے سے اتوار کے روز کہا کہ اس بات کی تصدیق ہو چکی ہے کہ لڑکیوں کو زہر جان بوجھ کر دیا گیا ہے۔

شیعہ مسلمانوں کے لیے مذہبی لحاظ سے اہمیت کے حامل شہر قم میں گزشتہ نومبر کے بعد سے ہی اسکول جانے والی سینکڑوں نوعمر طالبات سانس میں زہر کی بیماری سے پریشان ہیں۔ ان میں سے بہت سی لڑکیوں کا ہسپتالوں میں علاج بھی جاری ہے۔

ایران کے نائب وزیر صحت یوسف پناہی نے کہا کہ کچھ لوگ یہ حرکت اس لیے کر رہے ہیں تاکہ لڑکیوں کی تعلیم کا سلسلہ بند ہو جائے۔ انہوں نے کہا، "قم کے اسکولوں میں متعدد طالبات کو زہر دیے جانے کے بعد یہ بات سامنے آئی ہے کہ کچھ لوگ چاہتے ہیں کہ اسکول اور بالخصوص لڑکیوں کے اسکول بند ہو جائیں۔"

ایک پریس کانفرنس کے دوران یوسف پناہی نے کہا، "یہ بات معلوم ہوئی ہے کہ جس کیمیاوی مادے کو طالبات کو زہر دینے کے لیے استعمال کیا گیا تھا وہ جنگ میں استعمال ہونے والے کیمیکلس نہیں ہیں اور جو طالبات اس سے متاثر ہوئی ہیں انہیں شدید علاج کی ضرورت نہیں پڑی۔ جو کیمیاوی مادے پائے گئے ہیں ان میں سے بیشتر قابل علاج ہیں۔"

زہر دینے کے اس معاملے میں اب تک کسی کی گرفتاری نہیں ہوئی ہے۔ پارلیمان کی صحت سے متعلق کمیٹی کے ایک رکن ہمایوں سامع نجف آبادی نے بھی ایک نیوز ویب سائٹ کو انٹرویو دیتے ہوئے اس بات کی تصدیق کی کہ قم اور بروجرد کے اسکولوں میں طالبات کو زہر جان بوجھ کر دیے گئے تھے۔ حالانکہ اس سے قبل وزیر تعلیم یوسف نوری نے طالبات کو زہر دیے جانے کی خبروں کو "افواہ" قرار دیا تھا۔

تاہم لرستان کے نائب گورنر ماجد منعمی نے اتوار کے روز بتایا کہ مغربی ایرانی شہر بروجرد میں ایک ہائی اسکول میں 50 لڑکیوں کو پھر زہر دیا گیا ہے۔

ایرانی خبر رساں ایجنسی ارنا کے مطابق 14فروری کو طالبات کے سرپرست قم شہر کی انتظامیہ کے دفتر کے باہر جمع ہوگئے اور انہوں نے حکام سے اس واقعے کی وضاحت کا مطالبہ کیا۔

اس کے دوسرے روز حکومت کے ترجمان علی بہادری جہرومی نے کہا کہ وزارت انٹیلیجینس اور وزارت تعلیم زہر دینے کے اسباب کا پتہ لگانے کی کوشش کر رہی ہیں۔ گزشتہ ہفتے پروسیکیوٹر جنرل محمد جعفر منتظری نے ان واقعات کی عدالتی تحقیقات کا حکم دیا تھا۔ طالبات کو زہر دینے کا یہ سلسلہ دسمبر میں مذہبی شہرقم میں شروع ہوا تھا اور متعدد دیگر شہروں میں پھیل گیا۔

زہر دینے کے یہ واقعات ایسے وقت سامنے آئے ہیں جب 16 ستمبر کو ایک ایرانی کرد خاتون مہسا امینی کی اخلاقی پولیس کی حراست میں موت کے بعد سے ملک بھر میں جاری حکومت مخالف مظاہرے ابھی تک ختم نہیں ہوئے ہیں۔ ان مظاہروں میں نو عمر طالبات نے بھی بڑھ چڑھ کر حصہ لیا تھا اور احتجاج کے طور پر اپنے حجاب اتار دیے تھے۔