کالی مرچ چکن: افطار کے لیے خوشبودار انتخاب، مکمل ترکیب

رمضان المبارک میں افطار کے وقت اگر دسترخوان پر ایسی ڈش رکھی جائے جو خوشبودار بھی ہو اور زیادہ بھاری بھی نہ ہو تو محفل کا لطف دوبالا ہو جاتا ہے۔ کالی مرچ چکن ایک ایسا ہی انتخاب ہے جو سادہ مصالحوں کے باوجود گہرے ذائقے کا حامل ہوتا ہے۔ اس کی خاص بات تازہ پسی ہوئی کالی مرچ ہے جو ہر نوالے میں ہلکی سی تیزی اور خوشبو شامل کرتی ہے۔

یہ ڈش زیادہ تیل یا کریم کے بغیر بھی نہایت لذیذ بنتی ہے، اس لیے افطار کے لیے متوازن انتخاب سمجھی جا سکتی ہے۔ چھوٹے پیالے میں پیش کی جائے تو یہ نہ صرف دیدہ زیب لگتی ہے بلکہ روزے کے بعد طبیعت پر بھی بھاری نہیں پڑتی۔

اجزا:

چکن بون لیس آدھا کلو (کیوبز میں کٹا ہوا)

پیاز ایک عدد باریک کٹی ہوئی

ادرک لہسن کا پیسٹ ایک کھانے کا چمچ

تازہ پسی کالی مرچ ڈیڑھ چائے کا چمچ

نمک حسبِ ذائقہ

سفید مرچ پاؤڈر آدھا چائے کا چمچ

سویا سوس ایک کھانے کا چمچ

لیموں کا رس ایک کھانے کا چمچ

کارن فلور ایک چائے کا چمچ (اختیاری)

تیل دو سے تین کھانے کے چمچ

ہرا دھنیا ایک کھانے کا چمچ باریک کٹا ہوا

ترکیب:

سب سے پہلے چکن کے ٹکڑوں کو دھو کر خشک کر لیں۔ ایک پیالے میں چکن ڈال کر اس میں نمک، آدھی مقدار کالی مرچ، سفید مرچ، سویا سوس اور لیموں کا رس شامل کریں۔ اگر چاہیں تو ایک چائے کا چمچ کارن فلور بھی ملا دیں تاکہ گریوی قدرے گاڑھی رہے۔ اسے پندرہ سے بیس منٹ کے لیے میرینیٹ ہونے دیں۔

ایک کڑاہی میں تیل گرم کریں اور باریک کٹی پیاز ہلکی سنہری ہونے تک بھونیں۔ اس میں ادرک لہسن کا پیسٹ شامل کر کے خوشبو آنے تک پکائیں۔

اب میرینیٹ کیا ہوا چکن شامل کریں اور درمیانی آنچ پر پکائیں۔ چکن کا پانی خشک ہو جائے تو باقی کالی مرچ شامل کریں اور اچھی طرح مکس کریں۔ اگر ضرورت محسوس ہو تو دو سے تین کھانے کے چمچ گرم پانی ڈال کر ہلکی گریوی بنا لیں۔

چکن گل جائے اور تیل ہلکا سا الگ ہونے لگے تو چولہا بند کر دیں۔ آخر میں اوپر سے تازہ کٹی ہوئی ہری دھنیا چھڑک دیں۔

گرم گرم کالی مرچ چکن کو سادہ روٹی یا ہلکے چاول کے ساتھ افطار میں پیش کیا جا سکتا ہے۔ اس کی خوشبو اور ذائقہ رمضان کی شام کو ایک نفیس اور یادگار رنگ دے دیتا ہے۔