تمل ناڈو: وزیر اعلیٰ وجے کی سالگرہ پر وانیامبادی میں تعلیمی تقریب، 80 سے زائد طلبہ کو اعزازات سے نوازا گیا

وانیامبادی: تمل ناڈو کے ضلع تروپتور کے وانیامبادی علاقے میں وزیر اعلیٰ وجے تھلاپتی کی سالگرہ کے موقع پر ایک شاندار تعلیمی تقریب کا انعقاد کیا گیا، جس میں سرکاری اور سرکاری امداد یافتہ اسکولوں کے 80 سے زائد ہونہار طلبہ کو ان کی نمایاں تعلیمی کارکردگی پر نقد انعامات، تعریفی اسناد اور یادگاری اعزازات سے نوازا گیا۔ اس تقریب کا مقصد طلبہ کی حوصلہ افزائی کے ساتھ ساتھ معاشرے میں تعلیم کی اہمیت کو اجاگر کرنا تھا۔

تقریب کی صدارت وانیامبادی سے ٹی وی کے ایم ایل اے امیدوار سید برہان الدین نے کی۔ انہوں نے دسویں اور بارہویں جماعت میں نمایاں کامیابی حاصل کرنے والے طلبہ میں انعامات تقسیم کیے اور ان کی شاندار کارکردگی کو سراہا۔ اس موقع پر خطاب کرتے ہوئے سید برہان الدین نے کہا کہ تعلیم کسی بھی قوم کی ترقی اور خوشحالی کی بنیاد ہے اور نوجوان نسل کی حوصلہ افزائی مستقبل کی تعمیر میں اہم کردار ادا کرتی ہے۔ انہوں نے کہا کہ وزیر اعلیٰ وجے تھلاپتی کی سالگرہ کو اس مثبت اور تعمیری انداز میں منانا اس بات کی علامت ہے کہ معاشرے میں علم، محنت اور صلاحیتوں کو قدر کی نگاہ سے دیکھا جا رہا ہے۔

انہوں نے مزید کہا کہ طلبہ کی کامیابیاں پورے معاشرے کے لیے باعث فخر ہیں اور ایسے پروگرام نوجوانوں میں آگے بڑھنے کا جذبہ پیدا کرتے ہیں۔ تقریب میں موجود طلبہ، والدین اور اساتذہ نے اس اقدام کو بے حد سراہا۔ والدین کا کہنا تھا کہ اس طرح کے پروگرام بچوں میں اعتماد پیدا کرتے ہیں اور انہیں بہتر کارکردگی کے لیے ترغیب دیتے ہیں، جبکہ اساتذہ نے طلبہ کی بہتر رہنمائی اور تعلیمی معیار کو مزید بلند کرنے کے عزم کا اظہار کیا۔

تقریب خوشگوار ماحول میں منعقد ہوئی اور شرکاء نے اسے علاقے میں تعلیمی شعور کو فروغ دینے اور نوجوان نسل کو محنت، لگن اور اعلیٰ مقاصد کے حصول کے لیے آمادہ کرنے کی ایک اہم کوشش قرار دیا۔