پریس ریلیز
حج 2024: 3 دنوں میں 8 پروازوں سے 3029 حجاج کرام دہلی پہنچے
ایئرپورٹ پر دہلی اسٹیٹ حج کمیٹی کی چیئرپرسن کوثر جہاں نے 53 بغیر محرم حج کرنے والی خواتین کا استقبال کیا اور انھیں فریضۂ حج ادا کرنے کے لیے مبارکباد پیش کی۔
بغیر محرم حج کرنے والی خواتین کا دہلی ایئرپورٹ پر استقبال کرتی ہوئی دہلی حج کمیٹی کی چیئرپرسن کوثر جہاں
تصویر: پریس ریلیز
نئی دہلی: مقدس حج کے مکمل ہونے کے بعد عازمین حج کی وطن واپسی کے تیسرے دن آج سعودی ایئرلائنز کی ساتویں پرواز سے بغیر محرم حج کرنے والی 53 خواتین بصحت و سلامتی وطن عزیز ہندوستان واپس آ گئیں۔ دہلی کے اندرا گاندھی انٹرنیشنل ایئرپورٹ پر دہلی اسٹیٹ حج کمیٹی کی چیئرپرسن کوثر جہاں نے بغیر محرم حج کرنے والی خواتین کو پھولوں کے ہار پہنا کر استقبال کیا۔
اس موقع پر کوثر جہاں نے بتایا کہ دہلی اسٹیٹ حج کمیٹی بغیر محرم حج کا ارادہ رکھنے والی خواتین کے تعاون اور رہنمائی کے لیے ہر اعتبار سے پابند عہد ہے۔ دہلی حج کمیٹی کے ایگزیکٹیو افسر اشفاق احمد عارفی کے مطابق آج 4 پروازوں سے مجموعی طور پر 1396 عازمین حج کی دہلی واپسی ہوئی۔ دہلی اسٹیٹ حج کمیٹی نے دور دراز کے عازمین حج کے لیے ترکمان گیٹ پر واقع حج منزل میں حجاج کرام کے ٹھہرنے کا معقول انتظام کیا ہے اور ایسے حجاج کرام کو ایئرپورٹ سے حج منزل تک لانے کے لیے ایئرکنڈیشنر بسوں کا بھی انتظام کیا گیا ہے۔
یاد رہے کہ دہلی امبارکیشن پوائنٹ سے مقدس حج پر جانے والے حاجیوں کی وطن واپسی کا یہ سلسلہ 9 جولائی تک جاری رہے گا۔ 22 جون کو پہلی پرواز عازمین حج کو لے کر ہندوستان پہنچی تھی اور وطن واپس آنے والے سبھی عازمین حج کا دہلی اسٹیٹ حج کمیٹی کے افسران دل کی گہرائیوں سے استقبال کر رہے ہیں۔
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔