عمران کو نقصان پہنچانے پر خودکش حملہ ہو گا۔ پی ٹی آئی ایم پی کی دھمکی

پاکستان تحریک انصاف کے ایک رکن قومی اسمبلی نے پارٹی کے صدر عمران خان کو کسی طرح کا نقصان پہنچنے پر خود کش حملہ کرنے کی دھمکی دی ہے۔ پی ٹی آئی کے رکن اسمبلی عطاء اللہ نے یہ دھمکی سوشل میڈیا پر وائرل ہونے والی ایک ویڈیو میں دی ہے۔

ویڈیو میں عطاء اللہ کو تنبیہ کرتے ہوئے سنا جا سکتا ہے کہ ’اگر عمران خان کو بال برابر بھی نقصان پہنچایا جاتا ہے تو ملک چلانے والوں کو خبردار کیا جاتا ہے کہ نہ تو آپ اور نہ ہی آپ کے بچے بچیں گے ۔ سب سے پہلے میں آپ پر خودکش حملہ کروں گا۔ میں تمہیں جانے نہیں دوں گا۔ اسی طرح ہزاروں کارکن تیار ہیں۔‘

خیال ر ہے کہ مارچ کے آخر میں عمران خان کی حکومت کے آخری چند ہفتوں میں مسٹر عمران کی جان کو لاحق خطرے کو سب سے پہلے فیصل واوڈا نے عام کیا۔ اس کے بعد اپریل کے اوائل میں سابق وزیر اطلاعات فواد چوہدری نے انکشاف کیا تھا کہ ملکی سیکیورٹی ایجنسیوں نے عمران کو قتل کی سازش کی معلومات دی ہے۔

واضح رہے پاکستان میں عمران خان کی حکومت کے اقتدار سے بے دخل ہونے کے بعد پاکستانی سماج دو حصوں میں تقسیم ہو گیا ہے جس میں ایک حصہ عمران حامیوں کا ہے اور دوسرا عمران مخالفین کا ۔ پاکستان میں یہ پہلی مرتبہ ہوا ہے کہ کوئی حکومت عدم اعتماد کی تحریک منظور ہونے کے وجہ سےاقتدار سے بے دخل ہوئی ہے۔