پاکستان: خودکش حملہ میں پی ٹی آئی رہنما ہلاک

پاکستان میں انتخابات سے قبل امیدواروں اور انتخابی سرگرمیوں کو شدت پسندوں کی جانب سے نشانہ بنائے جانے کا سلسلہ جاری ہے اور اتوار کو خیبر پختونخوا اور بلوچستان میں ایسے تین واقعات میں سابق صوبائی وزیر ہلاک اور متعدد افراد زخمی ہو گئے ہیں۔ تحصیل کولاچی میں ہونے والے حملے میں پاکستان تحریکِ انصاف کے امیدوار اور سابق وزیر اکرام اللہ گنڈاپور ہلاک ہوئے۔

اکرام اللہ گنڈاپور بدھ کے روز ہونے والے عام انتخابات سے قبل اپنی انتخابی مہم کے میں مصروف تھے اور انہیں ڈیرہ اسماعیل خان میں خودکش حملہ آور نے نشانہ بنایا۔ اس واقعے میں ان کا ڈرائیور بھی ہلاک ہو گیا جب کہ دیگر تین افراد زخمی ہوئے۔

مقامی پولس افسر ظہور آفریدی نے خبر رساں ادارے ایسوسی ایٹڈ پریس کو بتایا کہ اکرام اللہ گنڈاپور کی گاڑی کو ایک خودکش بمبار نے ہدف بنایا۔ اس حملے کے بعد انہیں شدید زخمی حالت میں ہسپتال منتقل کیا گیا، تاہم وہ جان بر نہیں ہو سکے۔ آفریدی کے مطابق اس واقعے میں دیگر تین افراد زخمی ہوئے، جن میں سے دو پولیس اہلکار ہیں۔

رواں ماہ پاکستان کے جنوب مغربی صوبے بلوچستان کے علاقے مستونگ میں ایک انتخابی جلسے کے دوران ہونے والے خودکش بم حملے میں قومی اسمبلی کی نشست کے لیے امیدوار سراج رئیسانی سمیت 148 افراد ہلاک ہو گئے تھے۔ اس سے قبل پشاور میں ہونے والے ایک حملے میں عوامی نیشنل پارٹی کے صوبائی اسمبلی کی نشست کے لیے امیدوار ہارون بلور بھی ایک خودکش بمبار کے حملے میں مارے گئے تھے۔ پشاور میں ہونے والے اس حملے میں دیگر 20 افراد ہلاک ہوئے تھے۔

گنڈاپور کے بھائی اسرار گنڈاپور سن 2013 میں ہونے والے ایک خودکش حملے میں ہلاک ہوئے تھے، جب کہ اسرار گنڈاپور کی ہلاکت کے بعد اکرام اللہ گنڈاپور صوبائی اسمبلی کی اسی نشست سے فتح یاب ہو کر خیبرپختونخوا صوبے کی پارلیمان میں پہنچے تھے۔ گزشتہ صوبائی حکومت میں ان کے پاس وزارت زراعت کا قلم دان رہا تھا۔

سابق کرکٹر عمران خان کی سیاسی جماعت پاکستان تحریک انصاف نے اپنے سیاسی رہنما کی ناگہانی ہلاکت پر گہرے دکھ اور افسوس کا اظہار کیا ہے۔