دہشت گرد سے نہتے بھڑ گیا پاکستانی ’ہیرو‘، قومی ایوارڈ سے ہوگا سرفراز

خبر رساں ادارے اے ایف پی نے پاکستانی حکام کے حوالے سے بتایا ہے کہ نعیم رشید کو قومی ایوارڈ سے نوازا جائے گا۔ پاکستانی وزیر اعظم عمران خان نے انہیں بعد از مرگ اس اعزاز سے نوازنے کا اعلان کیا اور پھر ملکی وزارت خارجہ نے بھی اس بات کی تصدیق کر دی۔

جمعہ پندرہ مارچ کو کرائسٹ چرچ کی دو مساجد پر ہوئے دہشت گردانہ حملوں کے نتیجے میں ہلاک شدگان کی تعداد اب پچاس ہو گئی ہے، جن میں نو پاکستانی بھی شامل ہیں۔ جب یہ حملے کیے گئے تھے تو ان دونوں مسجدوں میں تارکین وطن کے پس منظر کے حامل بہت سے مسلمان جمعہ نماز کی ادائیگی کے لیے وہاں موجود تھے۔

النور مسجد میں ہوئے حملے کی ایک ویڈیو میں دیکھا جا سکتا ہے کہ جب حملہ آور مسجد کے مرکزی حصے کی طرف جانے کی کوشش میں تھا، تو ایک شخص نے اس کا راستہ روکنے کی کوشش کی۔ اسی دوران بہت سے نمازی وہاں سے فرار ہونے میں کامیاب ہو گئے تھے۔ کہا جا رہا ہے کہ جس شخص نے حملہ آور کو کچھ دیر کے لیے روکا تھا، وہ یہی پاکستانی شہری نعیم رشید تھا۔

عمران خان نے اتوار کے دن اپنی ایک ٹویٹ میں لکھا، ’’ہم کرائسٹ چرچ دہشت گردانہ حملوں کی زد میں آنے والے پاکستانیوں کے اہل خانہ کو مکمل معاونت فراہم کرنے کے لیے تیار ہیں۔ پاکستان کو میاں نعیم رشید پر فخر ہے، جنہوں نے سفید فام دہشت گرد پر قابو پانے کی کوشش میں جام شہادت نوش کیا۔ ان کے حوصلے کو قومی انعام کے ساتھ یادگار بنا دیا جائے گا۔‘‘

نعیم رشید کے بیٹے طلحہ بھی اس حملے میں ہلاک ہو گئے تھے۔ عمران خان نے نعیم رشید کو ان کی بہادری کے باعث قومی ایوارڈ سے نوازنے کا اعلان تو کیا ہے تاہم یہ نہیں بتایا گیا کہ انہیں بعد از مرگ کون سا ایوارڈ دیا جائے گا۔ پاکستان میں شہریوں کو بہادرانہ کارنامے سر انجام دینے پر متعدد قومی انعامات سے نوازا جاتا ہے۔

نعیم رشید کے بھائی خورشید عالم نے ایبٹ آباد میں اے ایف پی سے گفتگو میں کہا کہ حکومت پاکستان کی طرف سے ان کے بھائی کے لیے اس انعام کا اعلان ان کی فیملی کے لیے بہت زیادہ معنی رکھتا ہے، ’’مجھے فخر محسوس ہو رہا ہے۔‘‘ انہوں نے اپنے بھائی اور بھتیجے کی موت کو ایک بڑا صدمہ قرار دیا۔ انہوں نے کہا کہ نعیم گزشتہ برس ہی پاکستان آئے تھے اور دو ماہ کے لیے ان کے ساتھ رہے تھے۔

پاکستانی وزیر خارجہ شاہ محمود قریشی نے کہا ہے کہ نعیم رشید کو یہ قومی ایوارڈ تئیس مارچ کو دیا جائے گا۔ یہ انعام کون وصول کرے گا؟ اس بارے میں ابھی تک کوئی اطلاع نہیں ہے۔ پاکستانی وزیر خارجہ نے یہ تصدیق بھی کی کہ کرائسٹ چرچ حملوں کے نتیجے میں نو پاکستانی مارے گئے جبکہ ایک زخمی کی حالت نازک ہے۔

شاہ محمود قریشی نے مزید بتایا کہ ہلاک ہونے والے چھ پاکستانیوں کے کنبوں نے فیصلہ کیا ہے کہ وہ مقتولین کو کرائسٹ چرچ میں ہی دفنائیں گے جبکہ تین کنبوں کا کہنا ہے کہ وہ اپنے پیاروں کی آخری رسومات پاکستان میں ادا کریں گے۔ انہوں نے مزید کہا کہ پیر کے دن ان ہلاک شدگان کی یاد میں پاکستان بھر میں واقع حکومتی عمارتوں پر قومی پرچم سرنگوں رہے گا۔