کیا ٹرمپ کو مارنے کی تھی سازش! گولف کورس کے پاس ایک شخص گولہ و بارود اور پستول کے ساتھ گرفتار

امریکہ کی ریاست کیلیفورنیا میں لاس اینجلز کے قریب واقع صدر ڈونالڈ ٹرمپ کے گولف کورس پر سیکورٹی انتظامات کی نگرانی کرتا ہوا دکھائی دینے والے ایک شخص کو گرفتار کیا گیا ہے۔ حکام کے مطابق وہ تصاویر اور ویڈیوز بنا رہا تھا۔ اس کے پاس گولہ بارود ملا ہے اور اس کی کار سے ایک بھری ہوئی پستول بھی برآمد کی گئی ہے۔

لاس اینجلز کاؤنٹی شیرف کے محکمہ نے بتایا کہ ملزم کی جیب سے 16 راؤنڈ کی میگزین اور گولہ بارود برآمد ہوا ہے۔ پیر کے روز اس کے گھر کی تلاشی کے دوران بڑی تعداد میں ہتھیار، میگزین، گولہ بارود، باڈی آرمر اور ایسی نوٹ بکس برآمد ہوئیں، جن میں فکر انگیز باتیں لکھی ہوئی تھیں۔ شیرف کے محکمہ نے اس وقت گرفتاری کی اطلاع دی، جب ڈونالڈ ٹرمپ ریپبلکن نیشنل کمیٹی کے فنڈ ریزنگ ڈنر میں شرکت کے لیے رانچو پالوس وردیس میں واقع ٹرمپ نیشنل گولف کورس پہنچنے کی تیاری کر رہے تھے۔

بتایا جا رہا ہے کہ 38 سالہ ملزم کو چھپا کر ہتھیار رکھنے اور ممنوعہ گولہ بارود رکھنے کے الزام میں گرفتار کیا گیا ہے۔ شیرف کے محکمہ کے مطابق ایل سیگنڈو پولیس محکمہ پہلے ہی اس کے خلاف ڈکیتی کے ایک معاملے کی تحقیقات کر رہا ہے۔ لاس اینجلز کاؤنٹی شیرف کے محکمہ نے کہا کہ فی الحال کمیونٹی کے لیے کسی قابل اعتبار خطرے کی اطلاع نہیں ہے۔ قابل ذکر ہے کہ 2025 میں ایک جیوری نے فلوریڈا میں واقع ٹرمپ کے کنٹری کلب میں ان کے قتل کی کوشش کرنے والے ایک شخص کو قصوروار قرار دیا تھا۔