ٹرمپ کے حکم پر نیشنل گارڈز لاس اینجلس پہنچ گئے، پر تشدد مظاہرے جاری

امریکی صدر ڈونالڈ ٹرمپ کے حکم پر نیشنل گارڈ کے فوجیوں کے لاس اینجلس پہنچنے کے بعد مظاہرین سے ان کی جھڑپ ہوئی، اس دوران آنسو گیس کے گولے داغے گئے۔ جھڑپ اس وقت ہوئی جب کچھ مظاہرین نیشنل گارڈ کے جوانوں کے قریب پہنچے اور ان پر توہین آمیز نعرے لگانے لگے۔ یہ واقعہ گورنر اور میئر کے اعتراض کے باوجود صدر ٹرمپ کی جانب سے فوج کی تعیناتی کے چند گھنٹے بعد پیش آیا۔

اس دوران نیشنل گارڈز نے سڑک پر پیش قدمی کرتے ہوئے آنسو گیس کے گولے داغے جس سے مظاہرین کو پیچھے ہٹنا پڑا۔ چند منٹوں کے بعد ایک بار پھر زور دار دھماکوں کی آوازیں گونجنے لگیں جب کچھ مظاہرین نے 'گھر جاؤ' اور 'شرم کرو' کے نعرے لگائے۔ واضح رہے کہ اتوار کی صبح تقریباً 300 نیشنل گارڈ کے دستے ٹرمپ کے حکم پر لاس اینجلس پہنچے، جنہوں نے گورنر گیون نیوزوم اور دیگر ڈیموکریٹس پر امیگریشن ایجنٹوں کو نشانہ بنانے والے حالیہ مظاہروں کو روکنے میں ناکامی کا الزام لگایا۔

یہ اقدام کئی دہائیوں میں پہلی بار ہوا کہ کسی ریاست میں نیشنل گارڈ کو اس کے گورنر کی درخواست کے بغیر فعال کیا گیا۔ یہ تعیناتی دو دن کے مظاہروں کے بعد کی گئی ہے جو جمعہ کو لاس اینجلس کے مرکز میں شروع ہوااور شہر کے جنوب میں واقع لاطینی قصبے پیراماؤنٹ اور ہفتے کے روز پڑوسی کمپٹن تک پھیل گیا تھا۔

گزشتہ روز امیگریشن افسران کے متعدد چھاپوں کے بعد کشیدگی بہت زیادہ تھی، کیونکہ شہر میں ایک ہفتے کے دوران تارکین وطن کی گرفتاریوں کی تعداد 100 تک پہنچ گئی۔ ایک سرکردہ یونین لیڈر کو احتجاج کی قیادت کرتے ہوئے گرفتار کر لیا گیا اور اس پر قانون نافذ کرنے میں رکاوٹ ڈالنے کا الزام لگایا گیا۔

برینن سینٹر فار جسٹس کے مطابق، آخری بار نیشنل گارڈز کو گورنر کی اجازت کے بغیر  1965  میں فعال کیا گیا تھا، جب صدر لنڈن بی جانسن نے الاباما میں شہری حقوق کے مارچ کی حفاظت کے لیے فوج بھیجی تھی۔ ٹرمپ نے اس اقدام کو گورنر نیوزوم اور لاس اینجلس کے میئر کیرن باس کی بدامنی کو فوری طور پر روکنے میں ناکامی کے ایک ضروری ردعمل کے طور پر تیار کیا ہے۔ ٹرمپ نے کہا کہ انہوں نے نیشنل گارڈ کے 2000 ارکان کی تعیناتی کی اجازت دی ہے۔ ٹرمپ سے پوچھا گیا کہ کیا وہ امریکی فوجیوں کو لاس اینجلس بھیجنے کا ارادہ رکھتے ہیں؟ انہوں نے کہا کہ ہم ہر جگہ فوج رکھیں گے۔