امریکی وزیر دفاع اور سی آئی اے چیف کو ہٹانے کی تیاری میں ٹرمپ! یہودی میڈیا ’اسرائیل ہیوم‘ کا دعویٰ

امریکی وزیر دفاع پیٹ ہیگستھ اور سی آئی اے کے سرابراہ جان ریٹکلف کو عہدے سے ہٹایا جا سکتا ہے۔ وائٹ ہاؤس کے اعلیٰ افسران نے یہ معلومات یہودی میڈیا ’اسرائیل ہیوم‘ کو دی ہے۔ رپورٹ کے مطابق وائٹ ہاؤس سے وابستہ ایک افسر کا کہنا ہے کہ یہ دونوں ایران معاہدے کی مخالفت کر رہے تھے۔ انہیں اب اس کی ذاتی طور پر قیمت چکانی پڑ سکتی ہے۔

واضح رہے کہ پیٹ ہیگستھ کی کرسی پر طویل عرصے سے خطرہ منڈلا رہا ہے۔ کچھ روز قبل امریکی صدر ڈونالڈ ٹرمپ نے عوامی طور پر کہا تھا کہ اگر ایران میں مطلوبہ نتائج حاصل نہ ہوئے تو اس کی ذمہ داری ہیگستھ پر ہوگی۔ ٹرمپ کے مطابق ہیگستھ کے کہنے پر ہی ایران پر حملہ کیا گیا تھا۔ اس سے قابل امریکی میڈیا آؤٹ لیٹ ’ایکسیوس‘ نے ایک رپورٹ کی تھی۔ اس کے مطابق اتوار (14 جون) کو ٹرمپ نے سینئر افسران کی میٹنگ بلائی تھی۔ اس میٹنگ میں ہیگستھ اور جان ریٹکلف نے ایران معاہدے کی مخالفت کی تھی، حالانکہ ڈونالڈ ٹرمپ نے معاہدہ کرنے کا فیصلہ کیا۔

ڈونالڈ ٹرمپ نے مارچ 2026 کے آخر میں صحافیوں سے بات کرتے ہوئے کہا تھا کہ ’’ایران کے خلاف جنگ چاہنے والوں میں ہیگستھ سب سے آگے تھے۔ انہیں اس کی ذمہ داری بھی لینی ہوگی۔ ہیگستھ کے کہنے پر ہی جنگ کی شروعات کی گئی تھی۔‘‘ سی این این کے مطابق ٹرمپ کی ٹیم میں صرف نائب صدر جے ڈی وینس نے جنگ کی مخالفت کی تھی۔ یہی وجہ ہے کہ وینس کو ایران کے ساتھ مذاکراتی ٹیم کا سربراہ مقرر کیا گیا تھا۔ دوسری جانب امریکی کانگریس میں ہیگستھ پر سوال بھی اٹھ چکے ہیں۔ ہیگستھ کے خلاف کئی ڈیموکریٹک اراکین پارلیمنٹ عدم اعتماد کی تحریک لانے کی تیاری بھی کر چکے ہیں۔ حالانکہ مطلوبہ تعداد نہ ہونے کی وجہ سے یہ تحریک اب تک پیش نہیں کی جا سکی ہے۔

رپورٹ کے مطابق ایران سے معاہدے کو لے کر ٹرمپ کی ٹیم میں پھوٹ پڑ گئی ہے۔ ایک طرف جہاں ہیگستھ، ریٹکلف اور وزیر خارجہ مارکو روبیو معاہدے کے خلاف ہیں۔ دوسری جانب جے ڈی وینس، اسٹیو وٹکاف اور جیرڈ کوشنر نے معاہدے کی حمایت کی ہے۔ وینس اور وٹکاف کی وجہ سے ہی ایران معاہدے میں امریکہ نے اسرائیل کو اکیلے چھوڑ دیا، جس کے باعث نیتن یاہو اور ٹرمپ کے درمیان اختلافات کی خبریں آ رہی ہیں۔ منگل (16 جون) کو پیرس میں ٹرمپ نے عوامی طور پر اسرائیل پر تنقید کی تھی۔ ٹرمپ نے کہا تھا کہ حزب اللہ کے خلاف اسرائیل سے بہتر شام لڑ سکتا ہے۔