بنگلہ دیش میں پاکستان بنا رہا ہے ’اسلامک ریولیوشنری آرمی‘ 7 کیمپوں میں 8850 لوگوں کو آئی ایس آئی دے رہا ہے ٹریننگ

بنگلہ دیش میں محمد یونس کی عبوری حکومت کے ایک سینئر مشیر آصف محمود شوزیب بھویان نے انکشاف کیا ہے کہ ’اسلامک ریولیوشنری آرمی‘ (آئی آر اے) کے قیام کا پہلا مرحلہ جاری  ہے۔ بنگلہ دیش کی عبوری حکومت کے مشیر محمود شوزیب نے 20 اکتوبر کو سوشل میڈیا پلیٹ فارم پر بتایا کہ کئی مراکز پر 8850 لوگوں کی بھرتی اور ٹریننگ کا عمل جاری ہے۔

رپورٹ کے مطابق گزشتہ کچھ وقتوں سے بنگلہ دیش میں آئی ایس آئی بھی کافی سرگرم ہے۔ خبریں سامنے آئی تھیں کہ آئی ایس آئی کے لوگ آئی آر اے کے ممبران کو ٹریننگ دیں گے۔ اس درمیان اب یونس حکومت کے مشیر نے خود تصدیق کردی ہے کہ آئی آر اے لانے کا عمل جاری ہے۔ دراصل عبوری حکومت کو ایک ایسی تنظیم چاہیے جو ملک کے لیے نہیں بلکہ حکومت کے تئیں وفادار ہو اور آئی ایس آئی کے ساتھ مل کر کام کرے۔ یہی وجہ ہے کہ بنگلہ دیشی فوج کی جگہ اسلامک ریولیوشنری آرمی کو لانے کی تیاری چل رہی ہے۔ یونس حکومت کے سینئر مشیر کا کہنا ہے کہ ان لوگوں کو مارشل آرٹ، آتشیں اسلحہ کی تربیت، تائیکوانڈو اور جوڈو کی ٹریننگ دی جائے گی۔

جماعت اسلامی اور آئی ایس آئی کی کٹھپتلی کہی جانے والی یونس حکومت کئی ماہ سے آئی آر اے کا منصوبہ بنا رہی ہے۔ ہندوستانی افسران کے مطابق آئی آر اے ایران کے ’اسلامک ریولیوشنری  گارڈ کارپس‘ (آئی آر جی سی) کے طرز پر کام کرے گا۔ آئی آر اے ایک انتہائی بنیاد پرست تنظیم ہوگی، جو بنگلہ دیش کو ایک اسلامی ریاست میں تبدیل کرنے کے لیے اقتدار پر قابض لوگوں کی مدد کرے گی۔ اس کا ہدف ہندوستان بھی ہو سکتا ہے۔ آئی آر اے کے قیام کے بعد، سرحد پر کشیدگی میں کافی اضافہ ہو جائے گا۔

حال ہی میں جماعت کے ایک لیڈر ڈاکٹر سید عبد اللہ محمد طاہر نے نیویارک میں کہا کہ جماعت کے 50 لاکھ نوجوان ہندوستان کے خلاف لڑنے کے لیے تیار ہیں۔ اگر ہندوستان بنگلہ دیش میں داخل ہوتا ہے تو 1971 میں جو بدنامی ہوئی تھی وہ مٹ جائے گی۔ ہم خود کو حقیقی مجاہد آزادی ثابت کریں گے، اور جماعت کے 50 لاکھ لوگوں کا ایک حصہ گوریلا جنگ میں شامل ہوگا، جبکہ باقی لوگ ہندوستان کے اندر پھیل کر غزوۂ ہند کو نافذ کریں گے۔

مذکورہ بالا سرگرمیوں کے پیش نظر ماہرین کا خیال ہے کہ آئی ایس آئی نے بنگلہ دیش پر قبضہ کر لیا ہے۔ پاکستان ہمیشہ سے چاہتا تھا بنگلہ دیش کو 1971 سے پہلے کی حالت میں واپس لایا جائے۔ یہی وجہ ہے کہ شیخ حسینہ کے اقتدار سے بے دخل ہونے کے بعد سے وہ مسلسل اس منصوبہ پر کام کر رہا ہے۔ پہلے مرحلہ میں 7 ٹریننگ کیمپوں میں 8850 لوگوں کو ٹریننگ دی جا رہی ہے۔ ان تمام لوگوں کو پاکستان نواز ریٹائرڈ بنگلہ دیشی فوجی افسرن تربیت دے رہے ہیں۔

بنگلہ دیش میں اس وقت 160000 فوج کی تعداد ہے اور آئی آر اے کا مقصد فوج کی تعداد سے زیادہ لوگوں کو ٹریننگ دینا ہے۔ اس کے علاوہ ان کیمپوں میں پاکستانی فوج اور آئی ایس آئی کے افسران اکثر آتے جاتے رہتے ہیں۔ پاکستانی فوج اور آئی ایس آئی کے کمانڈر ہی اس ٹریننگ کے لیے پیسے اور ہتھیار مہیا کرا رہے ہیں۔ محمد یونس کے ذریعہ پاکستان کے لیے سمندری راستے کھولے جانے کے بعد سے ہتھیار اور گولہ-بارود بڑی تعداد میں بنگلہ دیش پہنچ رہے ہیں۔ یہ تمام فی الحال یونیورسٹیوں میں جمع کیے جا رہے ہیں، جن پر بڑے پیمانے پر جماعت کا کنٹرول ہے۔ ضرورت کے مطابق ان ہتھیاروں اور گولہ-بارود کو آئی آر اے کے ٹریننگ کیمپ میں کھلے عام پہنچایا جا رہا ہے۔

جماعت کی حمایت یافتہ تنظیمیں آئی آر اے کے متعلق بھی اپنے ارادوں کے بارے میں کھل کر باتیں کر رہی ہیں۔ جماعت اور آئی ایس آئی کے اشارے پر یونس حکومت بنگلہ دیش میں فوج اور ڈی جی ایف آئی دونوں کو بند کرنے کی کوشش کر رہی ہے۔ بنگلہ دیش میں پیش آنے والے حالیہ واقعات فوج کے اعلیٰ افسران اور حکمراں جماعت کے درمیان اختلاف کی نشاندہی کرتے ہیں۔ وہاں کی عدالتیں کئی فوج اور ڈی جی ایف آئی اہلکاروں کو گرفتار کرنے کا حکم دے رہی ہے۔ حالانکہ عدالت نے کہا ہے کہ یہ لوگ مظالم میں ملوث ہیں، لیکن حقیقت میں جن لوگوں کو نشانہ بنایا گیا ہے، وہ تمام شیخ حسینہ کے قریبی خیال کیے جاتے ہیں۔ افسران کا کہنا ہے کہ ان پیش رفتوں نے بنگلہ دیشی فوج کے اندر گہری دراڑیں پیدا کر دی ہیں، ساتھ ہی کئی لوگ آئی آر اے کے قیام کے حق میں ہیں۔