ترکی کے فوجیوں کے ساتھ عراق میں بڑا حادثہ، میتھین گیس کے رابطے میں آنے سے 8 کی موت

شمالی عراق میں ترکی کے فوجیوں کے ساتھ ایک خوفناک حادثہ پیش آیا۔ ترکی کی وزارت دفاع نے اطلاع دی ہے کہ اتوار کو شمالی عراق میں ایک غار کے اندر 2022 میں کرد جنگجوؤں کے ذریعہ مارے گئے ایک ساتھی فوجی کی باقیات کی تلاش کرتے وقت میتھین گیس کے رابطے میں آنے سے 8 ترکی فوجیوں کی موت ہو گئی۔ یہ فوجی ایک پہاڑی غار کے اندر تھے۔ باقیات کی تلاش کرتے کرتے ان میں سے 19 گیس کے رابطے میں آ گئے، جس کی وجہ سے 8 فوجیوں کی دم گھٹنے سے موت ہو گئی۔

وزارت کی طرف سے جاری ایک بیان میں کہا گیا، ’’فوجیوں کو فوراً اسپتال میں داخل کرایا گیا، لیکن سبھی کوششوں کے باوجود 8 جوان شہید ہو گئے۔‘‘ ساتھ ہی بتایا گیا کہ علاقے میں راحت و بچاؤ مہم جاری ہے۔ وزارت نے واقعہ کے لیے ’کلا-لاک آپریشن علاقہ‘ کے علاوہ کوئی خاص جگہ نہیں بتائی، جو اپریل 2022 میں شمالی عراق میں کردستان ورکرس پارٹی کا ’پی کے کے‘ کے خلاف شروع کیے گئے ایک آپریشن کا حصہ ہے۔

وزارت نے کہا کہ میتھین گیس سے متاثر ترکی یونٹ مئی 2022 میں سرچ انڈ کلیئر آپریشن کے دوران گولی باری میں مارے گئے ایک فوجی افسر کے باقیات کی تلاش کر رہی تھی۔ گزشتہ تین برسوں سے ٹیمیں اس کے باقیات کی تلاش کر رہی ہیں،  لیکن کامیابی نہیں ملی ہے۔

جس غار کی تلاش کی جا رہی تھی وہ غار 852 میٹر (2795 فٹ) کی اونچائی پر ہے اور ایسا مانا جاتا ہے کہ ماضی میں پی کے کے کی طرف سے اسے اسپتال کے طور پر استعمال کیا گیا تھا، حالانکہ بعد میں اسے ترکی فوجیوں کے ذریعہ صاف کر دیا گیا۔

ترکی اور ’پی کے کے‘ کے درمیان گزشتہ 40 سال سے لڑائی جاری ہے جو عراق اور شام کی سرحد تک پھیلی ہوئی ہے۔ ترکی نے شمالی عراق میں کئی ٹھکانے بنائے ہیں جہاں پی کے کے دہائیوں سے موجود ہے۔ حالانکہ اب ترکی حکومت اور پی کے کے میں ایک معاہدہ ہوا ہے، جس کے تحت پی کے کے لڑاکوں سے اگلے کچھ دنوں میں اپنے ہتھیار سونپنے کی امید ہے۔