امریکہ سے غیر قانونی تارکین وطن کا انخلا شروع، فوجی طیاروں میں سرحد پار لے جایا جا رہا ہے

امریکہ سے غیر قانونی تارکین وطن کا انخلا شروع ہو گیا ہے۔ انہیں فوجی طیاروں میں لاد کر سرحد پار لے جایا جا رہا ہے۔ ایسی ہی ایک پرواز کی تصویر وائٹ ہاؤس نے سوشل میڈیا پلیٹ فارم ’ایکس‘پر شیئر کی ہے۔

امریکی صدر ٹرمپ نے حلف اٹھانے کے فوری بعد جن ایگزیکٹو آرڈرز پر دستخط کیے تھے ان میں غیر قانونی تارکین وطن کو امریکا سے نکالنے کا حکم بھی شامل تھا۔ اب انتظامیہ نے اپنے نئے صدر کے اس حکم کو نافذ کر دیا ہے۔ امریکہ میں غیر قانونی تارکین وطن کی شناخت کی جا رہی ہے، انہیں پکڑا جا رہا ہے اور پھر امریکی سرحد سے باہر چھوڑ دیا جا رہا ہے۔

صدر ڈونلڈ ٹرمپ نے اپنے انتخابی وعدوں میں امریکہ میں غیر قانونی دراندازی کا معاملہ زور و شور سے اٹھایا تھا۔ اپنی پوری مہم کے دوران وہ یہ بات دہراتے رہے کہ صدر بنتے ہی وہ غیر قانونی تارکین وطن کو امریکی سرحد سے باہر بھیج دیں گے۔ اب جب کہ ان کے فیصلے پر عملدرآمد ہو رہا ہے، وائٹ ہاؤس نے تصویر کے ساتھ اپنی پوسٹ میں لکھا ہے، 'وعدے کیے گئے، وعدے وفا کیے گئے۔' پوسٹ میں لکھا ہے کہ 'حسب وعدے کے مطابق صدر ٹرمپ نے دنیا کو پیغام دیا ہے کہ جو بھی غیر قانونی طور پر امریکا میں داخل ہوگا اسے سنگین نتائج کا سامنا کرنا پڑے گا۔'

وائٹ ہاؤس کی جانب سے جاری کی گئی تصویر میں دیکھا جا سکتا ہے کہ غیر قانونی تارکین وطن کو ہتھکڑیاں لگی ہوئی ہیں۔ وہ ایک لائن میں کھڑے ہیں اور فوجی طیارے C17 کی طرف بڑھ رہے ہیں۔ پہلے دن ایسی دو پروازیں روانہ ہوئیں۔ دونوں میں 80 غیر قانونی تارکین وطن کو منتقل کیا گیا۔ یہ پروازیں امریکہ کے پڑوسی ملک گوئٹے مالا گئی تھیں۔

امریکی محکمہ ہوم لینڈ سیکیورٹی نے ایک بیان جاری کرتے ہوئے کہا، 'گوئٹے مالا اور امریکا غیر قانونی نقل مکانی کو مکمل طور پر ختم کرنے اور سرحدی سیکیورٹی کو مضبوط بنانے کے لیے پرعزم ہیں۔ اس کا آغاز آج دو پروازوں سے ہوا ہے۔