’کیا آپ پھر سے اپنی قسمت آزمانا چاہتے ہیں؟‘ ٹرمپ کی دھمکی پر ایران کے وزیر خارجہ عباس عراقچی کا طنز

ایران کے وزیر خارجہ عباس عراقچی نے امریکی صدر ڈونالڈ ٹرمپ کی دھمکی پر سخت جوابی حملہ کیا ہے۔ انہوں نے واشنگٹن کو ایران کے ساتھ ایک اور فوجی تصادم سے بچنے کی وارننگ دی ہے۔ عراقچی نے کہا کہ گزشتہ بار جب امریکہ نے ایران کو ’کام تمام کرنے‘ کی دھمکی دی تھی، تب ایران مزید مضبوط ہو کر ابھرا تھا۔ عراقچی نے سوشل میڈیا پلیٹ فارم ’ایکس‘ پر پوسٹ کرتے ہوئے لکھا کہ ’گزشتہ بار جب آپ نے ’کام تمام کرنے‘ کی کوشش کی تھی، تو ایران مزید مضبوط ہو کر ابھرا۔ کیا آپ پھر سے اپنی قسمت آزمانا چاہتے ہیں؟ آئیے، لیکن ہوشیار رہیں، ہمارے بھی کچھ کام ادھورے پڑے ہیں۔

ایرانی وزیر خارجہ عباس عراقچی نے اسرائیلی وزیر اعظم نیتن یاہو پر بھی سنگین الزامات عائد کیے ہیں۔ انہوں نے کہا کہ نیتن یاہو اپنے خلاف قانونی کارروائی اور جیل جانے سے بچنے کے لیے امریکہ کو ایک اور جنگ میں گھسیٹنے کی کوشش کر رہے ہیں۔ عراقچی نے خبردار کیا کہ اس قدم کے سنگین نتائج ہو سکتے ہیں۔ انہوں نے کہا کہ نیتن یاہو خود کو بچانے کے لیے امریکہ کو ایک اور جنگ کی جانب دھکیل رہے ہیں، چاہے اس کے نتائج کچھ بھی ہوں۔

عراقچی کا یہ تبصرہ ایسے وقت میں سامنے آیا ہے، جب 27 اکتوبر کو ہونے والے اسرائیلی پارلیمانی انتخابات سے قبل ٹرمپ نے نیتن یاہو کی حمایت کی ہے۔ اس کے ساتھ ہی انہوں نے خبردار بھی کیا کہ اگر اسرائیلی ووٹروں نے انتخابات میں کسی دوسرے لیڈر کو منتخب کیا تو امریکہ معاملات اپنے ہاتھ میں لے سکتا ہے۔ ٹرمپ نے ایران پر کئی دہائیوں سے اسرائیل اور امریکہ کو دھمکیاں دینے کا الزام لگایا ہے۔ انہوں نے ’اسرائیل مردہ باد، امریکہ مردہ باد‘ جیسے نعروں کا ذکر کیا۔ ٹرمپ نے دعویٰ کیا کہ ایران کو فوجی اور اقتصادی طور پر کمزور کر دیا گیا ہے۔ اس کے ساتھ ہی انہوں نے یہ بھی کہا کہ اگر ایران نے اپنا رویہ نہیں بدلا تو امریکہ جلد ہی اس کام کو مکمل کر دے گا۔

قبل ازیں ٹرمپ نے کہا تھا کہ کوئی بھی ملک اس وقت کیسے محفوظ رہ سکتا ہے، جب وہاں ایسی باتیں کہی جائیں۔ ایران ان خوفناک نعروں کو حقیقت میں بدلنا چاہتا تھا، لیکن اسے فوج کے ساتھ ساتھ اقتصادی محاذ پر بھی تباہ کر دیا گیا۔ اگر اس نے اب بھی خود کو نہیں بدلا تو اسے پوری طرح ختم کرنا پڑے گا۔ اگر اسرائیل کے پاس غلط لیڈر ہوتا تو امریکہ کو یہ کام خود کرنا پڑتا، اور میری ایسا کرنے کی کوئی خواہش نہیں ہے۔امریکی صدر ٹرمپ نے کہا کہ بی بی نیتن یاہو اسرائیل کے اندر سے ہونے والی شدید مخالفت کے باوجود مضبوط، بہادر اور ذہین بنے رہے ہیں۔ ان تمام حالات کے باوجود وہ نہ صرف ڈٹے رہے، بلکہ مزید طاقتور ہو کر ابھرے ہیں۔ میں نے بی بی کو انتہائی مشکل حالات میں بھی دیکھا ہے۔اہم بات یہ بھی ہے کہ نیتن یاہو نے ٹرمپ کی حمایت کا جواب بھی دیا۔ انہوں نے ایکس پر لکھا کہ صدر ٹرمپ، آپ کی حمایت کے لیے شکریہ۔ ہم مل کر کام کریں گے اور اپنا مشن مکمل کریں گے۔