روسی حملے کے درمیان یوکرین میں ’بلیک آؤٹ‘ جیسے حالات، عوام سے سبھی چیزیں چارج کر لینے کی اپیل

یوکرین کی قومی بجلی کمپنی ’یوکرینیرگو‘ نے بجلی پلانٹس کے روسی میزائلوں کی زد میں آنے کے سبب بجلی تخفیف کے اندیشہ کو دیکھتے ہوئے جمعرات کی صبح تک شہریوں سے کہا ہے کہ وہ سبھی چیزیں چارج کر لیں۔ بی بی سی کی ایک رپورٹ کے مطابق بدھ کی شب ایک بیان میں کمپنی نے کہا کہ 24 فروری کو جنگ شروع ہونے کے بعد روس کے ذریعہ گزشتہ 10 دنوں میں بجلی پلانٹس پر زیادہ حملے ہوئے ہیں۔

بیان میں کہا گیا ہے کہ جمعرات کو ہم بجلی خرچ کو قابو میں کرنے کے لیے پابندی نافذ کریں گے تاکہ پورا نظام متوازن طریقے سے کام کر سکے۔ گرڈ آپریٹر نے کہا کہ جمعرات کو ایک بار میں چار گھنٹے تک کی بجلی کٹوتی کی جائے گی، اس لیے پہلے سے ہی فون، پاور بینک، ٹارچ اور بیٹری کو چارج کر لینا چاہیے۔ کمپنی نے لوگوں سے پانی کا اسٹاک یقینی طور پر جمع کرنے کی اپیل بھی کی اور کہا کہ وہ اپنے پاس گرم موزے اور کمبل وغیرہ بھی رکھیں۔

یوکرینیرگو کی طرف سے کہا گیا ہے کہ پورے یوکرین میں صبح 7 بجے سے رات 10 تک پابندی نافذ ہو سکتی ہے۔ کمپنی نے شہریوں کو صلاح بھی دی ہے کہ وہ سہولت کے لیے کمپنی کے علاقائی نیٹورک آپریٹرس کی ویب سائٹس کو بھی دیکھتے رہیں۔ یہ الرٹ ملک بھر کے پاور پلانٹس پر 10 اکتوبر سے شروع روسی میزائلوں کے حملے کے بعد آیا ہے۔

اس سے قبل شہریوں سے اپیل کرتے ہوئے یوکرین کے صدر ولودمیر زیلینسکی نے بدھ کی شب کہا کہ بجلی کے غیر ضروری سامانوں کو نہ چلائیں اور بجلی کے خرچ کو محدود کریں۔ ایسا کرنے پر بجلی کٹوتی کا عمل ختم ہو جائے گا۔ صدر زیلینسکی نے یہ بھی کہا کہ ہم اپنے ملک کی معمول کی توانائی صلاحیتوں کو بحال کرنے کے لیے ہر ممکن کوشش کریں گے، لیکن اس کے لیے سبھی کو مل کر کوشش کرنے کی ضرورت ہے۔ زیلینسکی کے مطابق حال ہی میں روسی ہوائی حملوں سے یوکرین کے 30 فیصد بجلی پلانٹس متاثر ہوئے ہیں۔