بنگلہ دیش میں بی این پی کی زبردست واپسی، طارق رحمان نے دونوں نشستوں پر کامیابی حاصل کی

بنگلہ دیش کی تہرویں پارلیمنٹ  کے انتخابی رجحان سے تصویر صاف ہو چکی ہے اور بی این پی کے سربراہ طارق رحمان نے شاندار واپسی کی ہے۔ سترہ  سال بعد وطن واپس آنے کے بعد طارق رحمان نے دونوں نشستوں (ڈھاکا 17 اور بوگورہ 6) سے کامیابی حاصل کی ہے۔ بنگلہ دیش میں 2024 میں شیخ حسینہ کی حکومت کے خاتمے کے بعد پہلی بار انتخابات ہو رہے ہیں۔لندن سے آنے والے طارق رحمان کا  وزیر اعظم بننا طے سمجھا جا رہا ہے۔

خبر ہے کہ  بنگلہ دیش نیشنلسٹ پارٹی (بی این پی) بنگلہ دیش انتخابات میں اکثریت حاصل کر کے جیتنے کے لیے تیار ہے۔ مقامی میڈیا نے رپورٹ کیا کہ پارٹی نے اب تک 300 میں سے 151 حلقوں پر کامیابی حاصل کی ہے۔ ابتدائی رجحانات نے یہ بھی اشارہ کیا کہ جماعت اسلامی بنگلہ دیش  43 نشستیں حاصل کرکے مرکزی اپوزیشن کے طور پر ابھرے گی۔

بی این پی میڈیا سیل کے رکن شیر الکبیر خان نے ڈھاکہ ٹریبیون کو بتایا کہ غیر سرکاری نتائج میں طارق نے دونوں نشستوں پر کامیابی حاصل کی۔ یہ ان کی سیاسی طاقت کا ایک بڑا اشارہ ہے، کیونکہ وہ وزیر اعظم کے عہدے کے مضبوط دعویدار ہیں۔ ڈھاکہ 17 کے حلقے (گلشن، بریدرہ، بنانی اور کنٹونمنٹ کے علاقوں) میں طارق نے جماعت اسلامی کے امیدوار  کو شکست دی۔  بوگورہ-6 حلقہ (بوگورہ صدر) میں، طارق نے بھی جماعت کے امیدوار محمد عبدالرحمٰن کو دوگنے سے زیادہ ووٹ شیئر سے شکست دی۔

یہ الیکشن 2024 کے طلباء کے احتجاج کے بعد پہلا بڑا الیکشن ہے، جس میں عوامی لیگ (شیخ حسینہ کی پارٹی) انتخاب سے باہر ہے اور اس کا رجسٹریشن معطل کر دیا گیا  ہے۔ اصل مقابلہ بی این پی اور جماعت اسلامی کے اتحاد کے درمیان تھا۔ ابتدائی رجحانات میں بی این پی کو کئی نشستوں پر برتری ظاہر کی گئی۔

طارق رحمان نے صبح ڈھاکہ کے گلشن ماڈل ہائی سکول اینڈ کالج میں اپنا ووٹ کاسٹ کیا، ان کے ہمراہ ان کی اہلیہ ڈاکٹر زبیدہ رحمان اور بیٹی زائمہ رحمان بھی تھیں۔ اپنا ووٹ کاسٹ کرنے کے بعد انہوں نے کہا کہ بنگلہ دیش کے عوام ایک طویل عرصے سے اس دن کا انتظار کر رہے تھے اور انہیں ان کے حقوق واپس مل گئے ہیں۔ انہوں نے کچھ علاقوں میں ناخوشگوار واقعات کی اطلاعات کو نوٹ کیا، لیکن کہا کہ اگر بی این پی اقتدار میں آئی تو وہ امن و امان کو مضبوط کرے گی۔

طارق رحمان 2008 سے لندن میں مقیم تھے اور دسمبر 2025 میں اپنی والدہ خالدہ ضیا  سے ملنے بنگلہ دیش پہنچے تھےاور خالدہ ضیا نے کچھ ہی دنوں بعدآخری سانس لی ۔ ان کی جیت سے بی این پی کو بڑا سیاسی فائدہ ملے گا اور حکومت بنانے میں مدد ملے گی۔