چین کے ایک ریستوران میں خوفناک آتشزدگی، 22 افراد کی زندہ جلنے سے موت، کئی دیگر زخمی

چین کے لیاؤننگ علاقہ واقع ایک ریستوراں میں آج خوفناک آگ لگ گئی جس میں کئی لوگ بری طرح جھلس گئے۔ ریستوراں میں لگی آگ کی شدت کا اندازہ اس بات سے بخوبی لگایا جا سکتا ہے کہ آگ لگنے کے کچھ دیر میں ہی کم از کم 22 افراد کی زندہ جلنے سے موت ہو گئی۔ اس حادثہ میں کم از کم 3 افراد کے زخمی ہونے کی بھی خبر ہے، جنھیں علاج کے لیے قریبی اسپتال میں داخل کرایا گیا ہے۔

چینی افسران کا کہنا ہے کہ منگل کو لیاؤننگ علاقہ کے شمالی حصہ میں واقع شہر لیاؤیانگ کے ایک ریستوراں میں آگ لگنے سے 22 لوگ ہلاک ہو گئے اور 3 زخمی ہوئے ہیں۔ ابھی تک ریستوراں میں لگی اس آگ کے پیچھے کی وجہ پتہ نہیں چل پائی ہے۔ اس حادثہ سے متعلق کئی ویڈیوز سوشل میڈیا پلیٹ فارمز پر پوسٹ کی گئی ہیں، جن میں ایک عمارت کی کھڑکیوں اور دروازوں سے آگ کی شدید لپٹوں کو نکلتے ہوئے دیکھا جا سکتا ہے۔ کچھ ویڈیوز میں آگ کے شعلوں سے جان بچا کر دور بھاگتے لوگ بھی نظر آ رہے ہیں۔

چین کی سرکاری میڈیا کے مطابق ریستوراں میں یہ حادثہ منگل کی دوپہر 12.25 بجے لگی۔ ریستوراں میں آگ لگنے کے کچھ دیر بعد ہی ایمرجنسی سروس کے لوگ وہاں پہنچے اور آگ کو بجھانے کی کوششوں میں مصروف ہو گئے۔ آگ اس قدر شدید تھی کہ جلد اس پر قابو نہیں پایا جا سکا اور 22 لوگوں کی جان چلی گئی۔ اس حادثہ کے بعد چینی صدر شی جنپنگ نے زخمیوں کے علاج کے لیے ہر ممکن مدد کی ہدایت دی ہے۔