واہ! ٹرمپ کو نوبل امن انعام دینے کی تیاری، سات گورنروں کے دستخط

امریکا کے سات گورنروں نے امریکی صدر ٹرمپ کو اس سال کے امن نوبل انعام کے لیے نامزد کرنے کی حمایت کردی ہے اور اس کے لئے انہوں نے ایک خط پر دستخط کر دئے ہیں اس حمایت کا جواز انہوں نے یہ کہہ کر دیا ہے کہ وہ جزیرہ نما کوریا میں امن کے قیام کے لیے انقلابی کوششیں کررہے ہیں۔

جنوبی کیرولینا کے گورنر ہینری میکماسٹر اور دیگر 6 امریکی ریاستوں کے گورنروں نےحال ہی میں ناروے کی نوبل کمیٹی کے چیئرمین بیرٹ ریس اینڈرسن کے نام ایک خط لکھا ہے اور اس میں کہا کہ’’ ٹرمپ نے جوہری ہتھیاروں کے خلاف ایک پختہ موقف اختیار کیا ہے ۔وہ شمالی کوریا کے صدر پیانگ یانگ سے ملاقات کو تیار ہیں۔ انھوں نے دونوں کوریائی اور باقی دنیا کے درمیان تعاون ، دوستی اور اتحاد کے نئے ادوار شروع کرنے میں کامیابی حاصل کی ہے‘‘۔

اس خط سے قبل امریکی ایوان نمائندگان کے اٹھارہ ری پبلکن ارکان نے صدر ٹرمپ کو باضابطہ طور پر نوبل امن انعام کے لیے نامزد کیا تھا۔ جس ملک کے صدر کو اسی کے لوگ پسند نہ کرتے ہوں، اس کو نوبل امن انعام کے لئے نامزد کرنے پرلوگ بڑی حیرت کی نگاہ سے دیکھ رہے ہیں۔

صدر ٹرمپ کی نوبل امن انعام کے لیے نامزدگی کے خط پر دستخط کرنے والے دوسرے گورنروں میں ریاست گوام کے گورنر ایڈی بازا کالو ، میسیس پی کے گورنر فل برینٹ ، کنساس کے گورنر جیف کولیر ، الاباما کے گورنر کے آئیوی ، مغربی ورجینیا کے گورنر جیم جسٹس اور ریاست مین کے گورنر پال لی پیج شامل ہیں۔

اس درمیان جنوبی کوریا سے یہ اطلاع ملی ہے کہ شمالی کوریا نے دونوں ملکوں کے درمیان اعلیٰ سطح پر ہونے والے پہلے سے طے شدہ مذاکرات کو اچانک منسوخ کرنے کا اعلان کردیا ہے۔جنوبی کوریا کی ایک نیوز ایجنسی کے مطابق شمالی کوریا نے نصف شب کے وقت ایک فون کال کے ذریعے ملاقات منسوخ کرنے کی اطلاع دی ہے اور اس نے یہ فیصلہ امریکا اور جنوبی کوریا کے درمیان فضائیہ کی مشترکہ فضائی مشقوں کے ردعمل میں کیا گیا ہے۔ یہ عمل امریکی صدر ٹرمپ کے لئے بھی اچھینہیں ہے اور جو لوگ ان کو امن کا نوبال انعام دلانے کے کوشاں ہیں ان کے لئے بھی بری خبر ہے۔