بنگلہ دیش کی راجدھانی ڈھاکہ واقع رادھاکانت مندر میں 200 افراد نے کی توڑ پھوڑ

بنگلہ دیش کی راجدھانی ڈھاکہ میں موجود ’اسکان رادھاکانت مندر‘ میں زبردست توڑ پھوڑ کا واقعہ پیش آیا ہے۔ اس دوران مندر سے بیش قیمتوں سامانوں کی لوٹ سے متعلق بھی خبریں سامنے آ رہی ہیں۔ بتایا جاتا ہے کہ ڈھاکہ کے واری میں 222 لال موہن ساہا اسٹریٹ پر موجود اسکان رادھا کانت مندر پر 200 سے زائد لوگوں کی بھیڑ نے جمعرات کے روز حملہ کر دیا۔ اس حملہ کے دوران مندر میں موجود لوگ اپنی جان بچا کر بھاگتے نظر آئے اور کئی افراد زخمی بھی ہو گئے۔

میڈیا رپورٹ کے مطابق مندر پر حملہ جمعرات کی شام تقریباً 7 بجے ہوا۔ حملے کے دوران بھیڑ مندر میں موجود قیمتی سامان اٹھا کر لے گئی اور وہاں موجود سامانوں کے ساتھ توڑ پھوڑ بھی کی گئی۔ جو تصویریں سامنے آئی ہیں ان میں مندر کی دیواریں بھی ٹوٹی ہوئی دکھائی پڑ رہی ہیں۔ وہاں رکھے ہوئے سامان بکھرے پڑے ہیں۔ بتایا جاتا ہے کہ اس حملہ کے بعد مندر اور آس پاس کے علاقے میں حالات کشیدہ ہیں۔ ماحول زیادہ خراب نہ ہو، اس لیے سیکورٹی انتظامات کافی بڑھا دیے گئے ہیں۔

واضح رہے کہ گزشتہ سال بنگلہ دیش کے کومیلا شہر واقع نانور دیگھی جھیل کے پاس دُرگا پوجا پنڈال میں مبینہ طور پر قرآن کی بے ادبی کیے جانے کی خبریں پھیل گئی تھیں، پھر اس کے بعد پیدا تشدد میں کم از کم تین لوگ مارے گئے تھے۔ اس سے قبل ڈھاکہ کے ٹیپو سلطان روڈ اور چٹگاؤں کے کوتوالی میں بھی اس طرح کے واقعات سامنے آئے تھے۔ بنگلہ دیش حکومت نے شرپسند افراد کے خلاف کچھ سخت اقدام بھی کیے تھے۔