مودی-ٹرمپ کے درمیان فون پر ہوئی بات چیت میں نہیں شامل تھا کوئی ’تیسرا‘، مسک سے منسلک خبروں کو وزارت خارجہ نے کیا خارج

وزارت خارجہ کے ترجمان رندھیر جیسوال نے 24 مارچ کو وزیر اعظم نریندر مودی اور امریکی صدر ڈونالڈ ٹرمپ کے درمیان فون پر ہوئی بات چیت میں کسی تیسرے شخص کی شمولیت کے متعلق سامنے آئی خبروں پر ردعمل کا اظہار کیا ہے۔ ترجمان نے کہا کہ ہم نے اس خبر کو دیکھا ہے، لیکن 24 مارچ کو ہوئی ٹیلی فون بات چیت صرف وزیر اعظم مودی اور امریکی صدر ڈونالڈ ٹرمپ کے درمیان ہوئی تھی۔ انہوں نے مزید کہا کہ اس بات چیت کے دوران مغربی ایشیا کی صورتحال پر دونوں لیڈران نے تبادلہ خیال کیا تھا۔

واضح رہے کہ نریندر مودی اور ڈونالڈ ٹرمپ کی فون کال کے درمیان ایلون مسک کے شامل ہونے کا دعویٰ امریکی اخبار ’دی نیویارک ٹائمس‘ نے کیا ہے۔ اخبار کی رپورٹ کے مطابق اس کال میں ایلون مسک بھی شامل تھے، یہ اطلاع 2 امریکی افسران نے دی۔ حالانکہ اب تک یہ واضح نہیں ہے کہ ایلون مسک نے بات چیت میں کچھ کہا یا صرف سن رہے تھے۔

اس معاملہ کو ایسے سمجھا جا سکتا ہے کہ رپورٹس اور اصول و ضوابط یہ کہتے ہیں کہ 2 ممالک کے سربراہان کی بات چیت میں کسی تیسرے فرد کا شامل ہونا غیر معمولی سمجھا جاتا ہے، خاص کر جب معاملہ جنگ جیسے حالات کا ہو۔ ایسے میں میڈیا رپورٹ میں یہ بھی بتایا گیا ہے کہ حالیہ کچھ وقتوں میں ایلون مسک اور ڈونالڈ ٹرمپ کے تعلقات میں دوبارہ بہتری آئی ہے، جبکہ گزشتہ سال دونوں کے درمیان اختلافات کی خبریں سامنے آئی تھیں۔

قابل ذکر ہے کہ ڈونالڈ ٹرمپ سے فون پر ہونے والی بات سے متعلق وزیر اعظم مودی نے کہا تھا کہ ’’دونوں لیڈران نے خطے میں امن بحال کرنے اور کشیدگی میں کمی پر زور دیا۔ ساتھ ہی آبنائے ہرمز کو محفوظ اور کھلا رکھنے کی ضرورت پر بھی اتفاق کیا گیا۔‘‘