میرے والد نے ملک کے لیے جان دی جسے جھٹلایا نہیں جا سکتا: راہل

ویب سیریز ’سیکریڈ گیمز‘ سے متعلق کانگریس صدر راہل گاندھی نے ایک ٹوئٹ کیا ہے جس میں انھوں نے لکھا ہے کہ ’’بی جے پی-آر ایس ایس اظہارِ خیال کی آزادی پر کنٹرول اور نگرانی میں یقین کرتی ہے۔ میرا ماننا ہے کہ آزادی بنیادی جمہوری حق ہے۔‘‘ انھوں نے مزید لکھا کہ ’’میرے والد ملک کے لیے جیے اور انھوں نے ملک کے لیے ہی جان دی۔ کسی خیالی ویب سیزیز کے کرداروں کے نظریات اس حقیقت کو کبھی نہیں بدل سکتے۔‘‘

دراصل ایکٹر نوازالدین صدیقی، سیف علی خان اور اداکارہ رادھیکا آپٹے کی ویب سیریز سیکریڈ گیمز کے ’نیٹ فلکس‘ پر ریلیز ہوتے ہی تنازعہ شروع ہو گیا ہے۔ اس شو میں مبینہ طور پر سابق وزیر اعلیٰ آنجہانی راجیو گاندھی کے بارے میں قابل اعتراض تبصرے کیے گئے ہیں۔ کانگریس کے ایک کارکن راجیو سنہا نے کولکاتا پولس کو اس سلسلے میں تحریری شکایت دی ہے۔ اس ویب سیریز سے متعلق ممبئی ریاستی یوتھ کانگریس نے بھی احتجاج درج کیا ہے۔

یہ معاملہ دہلی ہائی کورٹ بھی پہنچ چکا ہے جہاں ایک عرضی میں مطالبہ کیا گیا ہے کہ اس شو میں سے سابق وزیر اعظم راجیو گاندھی کے لیے استعمال کیے گئے قابل اعتراض الفاظ کو ہٹایا جائے۔ دہلی ہائی کورٹ میں جمعرات کو معاملے کی سماعت ہونی تھی لیکن اسے پیر تک کے لیے ملتوی کر دیا گیا ہے۔ اس عرضی پر اب 16 جولائی کو سماعت ہوگی۔