جس بیٹے کی بھیڑ نے جان لے لی اس کے ریزلٹ نے والد کو رلا دیا

مغربی بنگال میں رام نومی کے موقع پر شدت پسند ہندوؤں کے ذریعہ 16 سالہ مسلم لڑکا صبغۃ اللہ کو جان سے مارے جانے کا معاملہ سامنے آیا تھا اور پھر اس کے والد مولانا امداد الرشیدی نے جس طرح سے ریاست میں فرقہ وارانہ ہم آہنگی قائم کرنے کے لیے مسلم طبقہ سے مشتعل نہ ہونے اور بیٹے کی موت کا بدلہ نہ لینے کی اپیل کی تھی، اس کی چہار جانب تعریف بھی ہوئی تھی۔ اس وقت اس خبر نے بھی سرخیاں بٹوری تھیں کہ صبغۃ اللہ نے میٹرک کا امتحان دیا تھا اور زندگی میں کچھ اچھا کرنے کے لیے پرعزم تھا۔ 6 جون یعنی بدھ کے روز صبغۃ اللہ کا ریزلٹ جاری ہوا جس میں اس نے تقریباً 58 فیصد نمبروں سے کامیابی حاصل کی۔ اس ریزلٹ کو دیکھ کر مولانا امداد الرشیدی کی آنکھیں نم ہو گئیں اور انھوں نے کہا کہ ’’میرا بیٹا انجینئر بننا چاہتا تھا۔ اس کا خواب اس کے ساتھ ہی دفن ہو گیا۔ لیکن اب میں ان اسٹوڈنٹس کی مدد کروں گا جن کے خواب کسی وجہ سے پورے نہیں ہو پاتے۔‘‘

صبغۃاللہ نے گزشتہ 21 مارچ کو آخری امتحان بایالوجی کا دیا تھا جو اس کا ایکسٹرا سبجیکٹ تھا۔ اس کے ایک ہفتہ بعد یعنی 28 مارچ کو اس کی لاش آسنسول میں اسی مسجد کے قریب سے ہی ملی تھی جہاں اس کے والد مولانا امدادالرشیدی امامت کرتے ہیں۔ صبغۃ اللہ کے گھر والوں کو اس کے دوستوں اور اساتذہ نے بتایا تھا کہ بدھ کے روز نتیجہ آنے والا ہے اور صبغۃ اللہ کے بڑے بھائی عطاء اللہ نے اسمارٹ فون پر نتیجہ دیکھا جس میں اس کے 58 فیصد نمبرآئے تھے جو کہ مغربی بنگال بورڈ میں قابل قدر نمبر قرار دئیے جا سکتے ہیں۔ ایک انگریزی نیوز ویب سائٹ کے مطابق صبغۃ اللہ کو انگریزی میں کافی دلچسپی تھی جس میں اس نے 61 نمبر حاصل کیے ہیں۔

مولانا امدادالرشیدی کے لیے اپنے مہلوک بیٹے کا ریزلٹ دیکھنا یقیناً جذباتی لمحہ تھا وہ اس کا اظہار کریں یا نہ کریں، ان کی آنکھیں سب کچھ ظاہر کر رہی تھیں۔ انھوں نے کہا کہ ’’میرا بیٹا اب زندہ نہیں ہے۔ وہ ڈاکٹر یا انجینئر بننا چاہتا تھا لیکن اپنے خوابوں کے بارے میں بہت زیادہ باتیں نہیں کرتا تھا۔ اب تو اس کے ساتھ ہی اس کے خواب بھی ہمیشہ کے لیے دفن ہو گئے۔‘‘ صبغۃ اللہ کے بڑے بھائی عطاء اللہ کا کہنا ہے کہ ’’ہم چاہتے تھے کہ وہ ڈاکٹر یا انجینئر بنے۔ وہ ہماری باتیں سنتا تھا لیکن اپنی خواہشوں کا بہت زیادہ اظہار نہیں کیا کرتا تھا۔ وہ بس اتنا کہتا تھا کہ میں کچھ الگ کرنا چاہتا ہوں، بس آپ سب دیکھتے رہیے۔‘‘