اہم خبر: بھگوان ’شیو‘ کی شکل میں نظر آئے لالو کے بیٹے تیج پرتاپ، مندر میں کی پوجا

آر جے ڈی صدر لالو پرساد یادو کے بڑے بیٹے تیج پرتاپ یادو آج بھگوان شیو کا لباس زیب تن کیے ہوئے نظر آئے۔ وہ اپنی شکل و شباہت بالکل بھگوان شیو کے جیسے ہی بنائے ہوئے تھے اور پٹنہ کے ایک مندر میں انھوں نے پوجا بھی کی۔

کھونٹی: جھارکھنڈ میں ضلع کھونٹی کے مرهو تھانہ علاقہ کے هٹگووا گاؤں میں بدمعاشوں نے بھارتیہ جنتا پارٹی (بی جے پی) لیڈر مانگو منڈو اور اس کی اہلیہ اور بیٹے کا گولی مار کر قتل کر دیا اور ایک دیگرخاتون کو زخمی کر دیا۔ پولیس ذرائع نے آج یہاں بتایا کہ گزشتہ رات کچھ بدمعاشوں نے بی جے پی لیڈر اور بلاک نائب صدر مانگو منڈو کے گھر دھاوا بولا۔ اس کے بعد بدمعاشوں نے مانگو منڈو (55) اس کی اہلیہ لكھمنی منڈو (45) اور بیٹے لپرائے منڈو (25) کو گھر سے باہر نکال کر گولی مار دی ۔ اس واقعہ میں مانگو منڈو اور لپرائے منڈو کی موقع پر ہی موت ہو گئی ۔ گولیوں کی آواز سن کر اپنے گھر سے باہر نکلی ایک دیگر خاتون نوري منڈو کو بھی بدمعاشوں نے گولی مار کر زخمی کر دیا ۔ ذرائع نے بتایا کہ زخمی لكھمني منڈو کو علاج کے لیے اسپتال لے جایا جا رہا تھا کہ راستے میں اس نے دم توڑ دیا ۔ نوري منڈو کو علاج کے لیے رانچی کے راجندر انسٹی ٹیوٹ میڈیکل سائنس میں داخل کرایا گیا ہے ۔ پولیس کے افسران موقع پر پہنچ کر معاملے کی جانچ کر رہے ہیں۔

کشمیر ایشو پر امریکی صدر کے دعویٰ کے بعد راہل گاندھی نے سخت رد عمل ظاہر کیا ہے۔ انھوں نے ٹوئٹ کر کہا کہ ’’صدر ٹرمپ نے کہا کہ پی ایم مودی نے ان سے کشمیر پر ہندوستان اور پاکستان کے درمیان ثالثی کرنے کو کہا ہے۔ اگر یہ سچ ہے تو پی ایم مودی نے ملک کے مفاد اور 1972 کے شملہ سمجھوتہ کے ساتھ دھوکہ کیا ہے۔ اس معاملے میں ایک کمزور وزارت داخلہ کی تردید سے نہیں بات نہیں بنے گی۔ پی ایم کو ملک کے سامنے آ کر بتانا ہوگا کہ ان کے اور ٹرمپ کے درمیان ہوئی میٹنگ میں کیا ہوا تھا۔‘‘

راجیہ سبھا کی کارروائی ٹرمپ کے بیان پر ہنگامہ کی نذر ہو رہی ہے۔ پہلے تو کارروائی 12 بجے کے لیے ملتوی ہوئی اور پھر یہ کارروائی 2 بجے کے لیے ملتوی ہو گئی۔

کشمیر معاملہ پر ٹرمپ کے ذریعہ دیے گئے بیان کو کانگریس اراکین پارلیمنٹ نے راجیہ سبھا میں پرزور طریقے سے اٹھایا اور وزیر اعظم نریندر مودی سے اس سلسلے میں صفائی دینے کے لیے کہا۔ کانگریس اراکین پارلیمنٹ کا جواب دیتے ہوئے وزیر خارجہ نے کہا کہ پی ایم مودی نے ٹرمپ سے کشمیر معاملہ پر کوئی بات نہیں کی اور کشمیر کا ایشو ہند-پاک کا دو فریقی ایشو ہے اور اس میں کوئی تیسرا ثالث نہیں۔ وزیر خارجہ نے ایشو کو سیاسی نہ بنائے جانے کی بات بھی کہی۔ ان باتوں کے درمیان راجیہ سبھا چیئرمین اور نائب صدر جمہوریہ نے کانگریس اراکین پارلیمنٹ سے سوال کیا کہ ٹرمپ پر بھروسہ ہے اور حکومت پر نہیں؟ انھوں نے مزید کہا کہ ایسی بحث سے ملک کمزور ہوتا ہے۔ ونکیا نائیڈو کی بات سن کر کانگریس اراکین پارلیمنٹ نے کہا کہ کشمیر پر بیان امریکی صدر نے دیا ہے، کسی وزیر خارجہ یا خارجہ سکریٹری نے نہیں۔ اس لیے ٹرمپ کے بیان پر صفائی بھی پی ایم نریندر مودی کو ہی دینی چاہیے۔

کشمیر معاملہ میں ہندوستان اور پاکستان کے درمیان ثالثی سے متعلق امریکی صدر ڈونالڈ ٹرمپ کے بیان پر تنازعہ بڑھ گیا ہے۔ کانگریس رکن پارلیمنٹ کے سریش اب اس سلسلے میں لوک سبھا میں تحریک التوا کا نوٹس پیش کر دیا ہے۔ واضح رہے کہ ٹرمپ نے کہا تھا کہ پی ایم نریندر مودی نے ان سے کشمیر معاملہ پر ثالثی کے لیے کہا ہے۔

مہاراشٹر کے بھیونڈی میں ایک کیمیکل گودام میں زبردست آگ لگ گئی ہے۔ موقع پر دمکل کی کئی گاڑیاں موجود ہیں۔ آگ پر قابو پانے کی کوشش جاری ہے۔ شروعاتی جانکاری کے مطابق آگ دھیرے دھیرے کیمیکل کے ایک گودام سے بڑھتی ہوئی تیسرے گودام تک پہنچ گئی ہے۔