اہم خبریں: بی جے پی کی پنجاب انتخابات کے لئے 27 امیدوار کی فہرست جاری

بی جے پی نے پنجاب انتخابات کے لئے 27 امیدواروں کی فہرست جاری کی ہے۔ فتح سنگھ باجوہ بٹالہ سے، وجے سانپلا پھگواڑہ سے انتخاب لڑیں گے۔

5G نیٹورک معاملہ میں دہلی ہائی کورٹ کی ڈویژن بنچ نے اداکارہ جوہی چاولہ پر عائد جرمانہ 20 لاکھ روپے سے کم کر کے 2 لاکھ روپے کر دیا ہے۔ بنچ نے ملک میں 5G وائرلیس نیٹ ورک کے قیام کے خلاف دائر مقدمہ کو خارج کرنے کے دوران سنگل جج کے ذریعہ کئے گئے متعدد مشاہدات کو بھی خارج کر دیا۔

پارلیمنٹ کے بجٹ اجلاس سے قبل کانگریس پارٹی کی جانب سے ایک اجلاس طلب کیا گیا ہے۔ کانگریس کے پارلیمانی حکمت عملی گروپ کے کل یعنی جمعہ کے روز منعقد ہونے جا رہے اس اجلاس کی صدارت کانگریس کی صدر سونیا گاندھی کریں گی۔ اجلاس کےک دوران ڈاکٹر منموہن سنگھ، اے کے انٹونی، کے سی وینوگوپال، ملیکارجن کھڑگے، ادھیر رنجن چودھری، آنند شرما، گورو گگوئی، کے سریش، جے رام رمیش، مانیکم ٹیگور اور رونیت بٹو موجود رہیں گے۔

مہاراشٹر کی راجدھانی ممبئی کے ملاڈ میں ایک اسپورٹس کمپلیکس کا نام ٹیپو سلطان کے نام پر رکھے جانے کے بعد بی جے پی اور ہندوتوادی تنظیموں کی جانب سے کئے جا رہے احتجاج پر شیو سینا لیڈر سنجے راؤت نے جواب دیا ہے۔ سنجے راؤت نے کہا، ’’بی جے پی سمجھتی ہے کہ صرف اسے ہی تاریخ کا علم ہے۔ ہر کوئی تاریخ تبدیل کرنے کی کوشش میں مصروف ہے، یہ مورخ تاریخ بدل رہے ہیں۔ ہمیں ٹیپو سلطان کے بارے میں سب کچھ پتہ ہے، ہمیں بی جے پی سے کچھ سیکھنے کی ضرورت نہیں ہے۔‘‘ انہوں نے کہا کہ ریاستی حکومت اپنے فیصلے لینے کی اہل ہے۔ نئی تاریخ لکھنے کی کوشش نہ کریں، آپ دہلی میں بیٹھ کر نئی تاریخ لکھنے کی کوشش کر سکتے ہیں لیکن کامیاب نہیں ہونگے۔‘‘

مرکزی وزارت صحت کے مطابق ہندوستان میں گزشتہ 24 گھنٹوں کے دوران کورونا وائرس کے 2 لاکھ 86 ہزار 384 نئے کیسز کی تصدیق کی گئی ہے۔ اس دوران 3 لاکھ 06 ہزار 357 مریضوں نے شفایابی حاصل کر لی جبکہ 573 افراد ہلاک ہو گئے۔ ملک میں کئی دنوں کے بعد فعال کیسز میں گراوٹ درج کی گئی ہے اور فی الحال ان کی تعداد 22 لاکھ 02 ہزار 472 ہے۔ یومیہ پازیٹوٹی کی شرح 19.59 فیصد ہو گئی ہے۔ وہیں، ملک بھر میں اب تک 163 کروڑ سے زدیاہ کورونا ویکسین کی خوراکیں فراہم کی جا چکی ہیں۔